上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
2
以利亞受接上天
上主啲欲用捲螺仔風接以利亞上天的時，以利亞及以利沙做夥離開吉甲。
2 以利亞對以利沙講：「上主差我去伯特利，你著留𫢶遮。」
以利沙講：「我指永活的上主及你的性命咒誓，我一定無欲離開你。」𪜶兩個人就做夥落去伯特利。
3 伯特利許個先知的學生出來見以利沙，對伊講：「上主今仔日欲接你的老師離開你去，你知無？」
伊講：「我知，請恁恬恬。」
4 以利亞給伊講：「以利沙，上主差我去耶利哥，你著留𫢶遮。」
以利沙講：「我指永活的上主及你的性命咒誓，我一定無欲離開你。」𪜶就到耶利哥。
5 耶利哥許個先知的學生來以利沙遐，對伊講：「上主今仔日欲接你的老師離開你，你知無？」
伊講：「我知，請恁恬恬。」
6 以利亞對以利沙講：「上主差我去約旦河，你著留𫢶遮。」
以利沙講：「我指永活的上主及你的性命咒誓，我一定無欲離開你。」𪜶兩個人就做夥去。
7 有五十個先知的學生隨𪜶去，遠遠徛佇𪜶的對面；𪜶兩人徛佇約旦河邊。
8 以利亞將伊的外衫捲起來，拍河水，水就分雙旁；𪜶兩人行焦地過去。
9 過去了，以利亞對以利沙講：「我受接離開你以前，你愛我為著你做什麼？你著給我講。」
以利沙講：「求你將感動你的神加倍互我。」
10 以利亞講：「你所求的真困難。毋拘，我受接離開你的時，你若看著我，就會得著；若無，就得𣍐著。」
11 𪜶那行那講的時，忽然有火戰車火馬，將𪜶兩人隔開；以利亞就坐捲螺仔風受接上天。
12 以利沙看著，就喝講：「師父啊，師父啊！以色列的戰車及馬兵啊！」後來以利沙無閣看著以利亞；就將家己的衫拆做兩旁。
13 伊拾以利亞加落落來的外衫，倒轉去徛佇約旦河邊，
14 用彼領外衫拍河水，講：「上主 — 以利亞的上帝佇叨位？」拍水了後，水就分做兩旁，以利沙就過去。
15 以利沙對面許個耶利哥先知的學生看著，就講：「感動以利亞的神臨在佇以利沙啦！」𪜶就來迎接伊，仆落佇伊的面前。
16 𪜶對以利沙講：「你的僕人遮有五十個勇士；請你允准𪜶去尋你的老師；可能上主的神帶伊去，給伊㧒佇某一個山，抑是某一個山谷。」伊講：「毋免差人去。」
17 𪜶一直給以利沙姑情，以利沙互𪜶逼甲真為難，就講：「恁通差許個勇士去。」𪜶就差五十人去，尋三日，尋攏無。
18 以利沙佇耶利哥聽候；𪜶倒來了後，伊給𪜶講：「我豈無給恁講，毋免去尋？」
以利沙行的神跡
19 耶利哥城的人對以利沙講：「先生，照你所知此個城的地勢真好；毋拘水質真僫，土地𣍐生產。」
20 以利沙講：「恁用一塊新的碗，貯鹽提來互我。」𪜶就提來互伊。
21 伊去到水泉遐，將鹽倒佇水裡，講：「上主按呢講：『我醫好此個水；此個水𣍐閣互人死，嘛𣍐閣互地無生產。』」
22 彼個水就變做好水，到今仔日；抵照以利沙所講的話。
23 以利沙對遐上去伯特利，佇路裡啲行的時，有少年人對城內出來，給伊恥笑，講：「禿頭的，閃走！禿頭的，閃走！」
24 伊越頭給𪜶看，奉上主的名咒詛𪜶，就有兩隻熊母對樹林出來，拆裂𪜶中間四十二個少年人。
25 伊對遐上迦密山；閣對遐倒去撒馬利亞。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。