上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
1
以利亞及亞哈謝王
亞哈死了，摩押背叛以色列。
2 以色列王亞哈謝佇撒馬利亞對王宮樓頂的欄杆跋落來，受傷；就差使者，對𪜶講：「恁去問以革倫的神明巴力‧西卜，我此個傷會好𣍐？」
3 上主的使者給提斯比人以利亞講：「你起來，去見撒馬利亞王的使者，問𪜶講：『恁去問以革倫的神明巴力‧西卜，是因為以色列中無上帝是無？
4 恁著去給王講，上主按呢講：你𣍐當閣對現在啲倒的眠床起來；你一定會死。』」以利亞就去。
5 使者倒去見王，王問𪜶講：「恁是按怎倒來？」
6 使者應伊講：「阮抵著一個人，伊給阮講：『恁倒去見差恁的王，對伊講，上主按呢講：你差人去問以革倫的神明巴力‧西卜，是因為以色列中無上帝是無？所以你𣍐當閣對現在啲倒的眠床起來；你一定會死。』」
7 王問𪜶講：「來抵著恁，給恁講諸個話的人是什麼款人？」
8 𪜶應講：「伊穿有毛的衫，腰縖皮帶。」
王講：「伊一定是提斯比人以利亞。」
9 王就派一個管五十人的軍官導許個部下去以利亞遐。伊𬦰上山，看著以利亞坐佇山頂。軍官給以利亞講：「上帝重用的人，王命令你落來。」
10 以利亞應軍官講：「我若是上帝重用的人，願天降火，燒你及你彼五十個人。」就有火對天落來，燒滅伊及彼五十人。
11 王閣派一個管五十人的軍官導許個部下去以利亞遐。軍官給以利亞講：「上帝重用的人，王命令你趕緊落來。」
12 以利亞應講：「我若是上帝重用的人，願天降火，燒你及你彼五十個人。」就有真大的火對天落來，燒滅伊及彼五十人。
13 王第三遍閣派一個管五十人的軍官導許個部下去。彼個第三隊的軍官𬦰上山，跪佇以利亞的面前，哀求伊，講：「上帝重用的人，求你看我及你此五十個僕人的性命做寶貝。
14 已經有火對天降落，燒滅以前兩個軍官，及彼一百人。今求你看我的性命做寶貝。」
15 上主的使者對以利亞講：「你及伊落去，毋免驚伊。」以利亞就起來，及伊落去見王，
16 對王講：「上主按呢講：『你派人去問以革倫的神明巴力‧西卜，是因為以色列中無上帝互你通問是無？所以你𣍐當閣對現在啲倒的眠床起來，你一定會死。』」
17 亞哈謝就死，抵照以利亞所傳達上主的話。王無子，伊的小弟約何蘭續接伊作王；彼時是猶大王約沙法的子約蘭作王第二年。
18 亞哈謝其他的事蹟攏記載佇《以色列列王史》。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。