上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
17
以利亞預言曠旱
住佇基列的提斯比人以利亞對亞哈講：「我指我所服事永活上主 — 以色列的上帝咒誓：『此幾年，我若無祈求，就無露水，嘛𣍐落雨。』」
2 上主的話臨到以利亞講：
3 「你著離開遮，斡對東旁去，匿𫢶約旦河的東勢基立溪邊。
4 你欲飲彼條溪的水；我已經命令烏鴉佇遐供給你。」
5 伊就照上主的話，去𫢶佇約旦東勢的基立溪。
6 逐日的早起時及日落的時，烏鴉攏帶餅及肉來互伊；伊飲溪裡的水。
7 後來溪水焦，因為彼個地方無落雨。
以利亞及撒勒法的寡婦
8 上主的話臨到以利亞，講：
9 「起來，去西頓的撒勒法，住𫢶遐。我已經命令彼所在一個寡婦供給你。」
10 伊就起來，去撒勒法；到城門的時，抵好有一個寡婦佇遐啲拾柴。以利亞就叫伊，講：「請用器具舀淡薄水互我飲。」
11 伊去舀水的時，以利亞閣叫伊講：「請順手提淡薄餅來互我。」
12 婦仁人講：「我指永活的上主 — 你的上帝咒誓，我連一塊餅都無，桶仔內只有一把仔麵粉，瓶內嘛只有一屑仔油。你看，我拾此兩枝柴，欲倒去為著我及我的子做餅；阮食了就欲等死。」
13 以利亞給伊講：「免驚！你去，照你所講的去做；毋拘代先做一塊細塊餅互我，然後為著你及你的子做餅。
14 因為上主 — 以色列的上帝按呢講：『桶內的麵粉𣍐減少，瓶內的油用𣍐了，直到上主落雨彼日。』」
15 婦仁人就照以利亞的話做。以利亞、婦仁人，以及伊厝內的人食真多日，
16 抵照上主通過以利亞所講的，桶內的麵粉無了，瓶內的油無減。
17 諸個代誌了後，彼家的女主人的子破病，病甲真傷重，煞斷氣。
18 婦仁人給以利亞講：「上帝重用的人啊，我及你有什麼關係？你來我遮煞互上帝想起我的罪，害我的子死。」
19 以利亞給伊講：「將你的子交互我。」以利亞對婦仁人的胸前給囝仔抱去，帶去樓頂伊的房間，下佇伊家己的眠床。
20 伊求叫上主講：「上主 — 我的上帝啊，我住佇此個寡婦的厝，你哪欲降災禍互伊，害死伊的子？」
21 以利亞就仆佇囝仔的身軀三遍，祈求上主講：「上主 — 我的上帝啊，求你互此個囝仔回魂。」
22 上主聽以利亞的祈禱，互囝仔回魂，閣活起來。
23 以利亞就抱彼個囝仔對樓頂落來，入去厝內交互囝仔的老母。以利亞講：「你看，你的子活啦。」
24 婦仁人對以利亞講：「今我知你是上帝重用的人，上主通過你所講的話攏是真實。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。