上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
6
所羅門起造聖殿
( 代下 3:2-4 )
以色列人出埃及了後四百八十年，所羅門做以色列王第四年二月，就是西弗月，伊動工起造上主的聖殿。
2 所羅門王為上主起的殿，長二十七公尺，闊九公尺，高十三公尺半。
3 殿前的走廊深四公尺半，闊九公尺，及殿平闊。
4 伊為著聖殿做內面闊外面狹的窗仔。
5 伊佇倚聖殿，包括前殿及內殿的外壁四圍起廂房；
6 第一層闊兩公尺二十公分，第二層闊兩公尺七十公分，第三層闊三公尺十公分；佇聖殿的外壁四圍閣做幫牆，才免互楹仔插入殿的壁。
7 起造聖殿的石材已經攏佇石場拍好，所以起造的時就無槌、斧頭，及逐種鐵器的聲。
8 廂房第一層的入口佇聖殿的南旁；對第一層有捲螺梯上第二層，對第二層上到第三層。
9 伊用柏香柴做樑，用柏香柴板做厝頂；按呢，聖殿就起好。
10 倚聖殿的壁起的廂房，逐層高兩公尺二十公分；柏香柴的樑攏靠佇殿的幫牆。
11 上主對所羅門講：
12 「關係你所起此間聖殿，你若切實遵行我的規例、命令，及誡命，我就欲對你實現我應允你的老父大闢的話。
13 我欲𫢶佇以色列人的中間，一定𣍐放拺我的子民以色列。」
聖殿內部的設備
14 ( 代下 3:8-14 )
所羅門完成起造聖殿的工作。
15 伊用柏香柴板貼聖殿內面的壁，對土腳到壁頂；閣用松樹板鋪殿的土腳。
16 閣佇殿內面的後旁隔一間內殿做至聖所，長九公尺；對土腳到壁頂用柏香柴板隔起來。
17 前殿長十八公尺。
18 聖殿內面的柏香柴板攏有刻匏仔及花蕊；殿內攏用柏香柴包啲，連一塊石頭都看𣍐著。
19 內殿準備欲安置上主的約櫃。
20 內殿，長、闊、高攏九公尺，內面貼純金；香壇用柏香柴蓋啲。
21 所羅門用純金貼聖殿的內部，嘛用純金貼內殿的入口，閣牽金鍊仔。
22 聖殿的內部及內殿前的香壇攏貼金，到歸間聖殿攏貼滿。
造兩個基路伯
23-26 佇內殿的內面，所羅門用橄欖柴造兩個天使基路伯，逐個高四公尺四十公分。基路伯兩旁的翼逐旁長兩公尺二十公分；對此旁的翼尾到彼旁的翼尾，約四公尺四十公分。另外一個基路伯嘛像款。
27 伊將基路伯下佇內殿的內面；基路伯的翼搋開，第一個基路伯一旁的翼抵著此旁的壁，第二個一旁的翼抵著彼旁的壁；𪜶另外兩支翼佇殿的中央相磕。
28 伊閣用金貼許個基路伯。
聖殿的妝飾
29 聖殿的前殿及內殿四圍的壁，攏有刻基路伯、棕樹，及花蕊的形狀。
30 前殿及內殿的地板攏貼金。
31 所羅門閣用橄欖柴做入內殿的門；門楣及門徛攏是五角形的柱。
32 佇用橄欖柴造的兩個門扇刻基路伯、棕樹，及花蕊，攏貼金；閣用金鑲佇基路伯及棕樹頂面。
33 閣佇前殿的入口用橄欖柴做四角形的門徛。
34 用松樹柴做雙旁的門扇；兩旁的門扇各有兩片，會拗得；
35 頂面刻基路伯、棕樹，及花蕊，攏貼金；閣將金拍平，鑲佇雕刻物的頂面。
36 伊閣用拍好的石三排及柏香柴一排來起內埕。
37 所羅門作王第四年二月，就是西弗月，下上主聖殿的地基。
38 到十一年八月，就是布勒月，聖殿所有的工程攏照計劃完成；起造共七年久。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。