上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
24
大闢調查戶口
( 代上 21:1-17 )
上主閣對以色列人受氣，激動大闢來對付𪜶，講：「去調查以色列及猶大的人口。」
2 王吩咐伊身邊的元帥約押講：「你去以色列逐個支族，對但到別是巴，點算人口，互我知全國人民的數目。」
3 約押對王講：「願上主 — 你的上帝互全國人民增加百倍，閣互我的主我的王親目看見；毋拘我的主我的王是按怎愛欲做此個代誌？」
4 王堅持伊的命令。約押及許個軍長就奉命出去，點算以色列的人口。
5 𪜶過約旦河，佇迦得山谷中亞羅珥城的南旁紮營，對遐去雅謝；
6 經過基列，到他停‧合示地區，閣到但‧雅安，踅到西頓；
7 閣到泰爾堅固的城，及所有希未人以及迦南人的城；最後到猶大南旁的別是巴。
8 𪜶行透全國，經過九個月閣二十日，倒轉來耶路撒冷。
9 約押將點算的人數報告互王知。以色列人攑刀的戰士有八十萬，猶大人有五十萬。
10 大闢點算人民的數目了後，心內自責。大闢對上主講：「我做此個代誌犯真大的罪。上主啊，求你除去你奴僕的罪，因為我按呢做真戇。」
11 大闢透早起來，上主的話臨到大闢的先見迦得先知，講：
12 「你去給大闢講，上主按呢講：『我用三項災禍互你揀一項，我就照按呢做。』」
13 迦得來給大闢講：「你愛你的國飢荒七年？抑是互你的對敵追殺三個月？抑是愛你的國有瘟疫三日久？你著斟酌想，互我通回復差我來彼位。」
14 大闢給迦得講：「我真為難，毋拘咱寧可互上主家己給咱刑罰，因為伊有豐盛的憐憫；我毋願陷落佇人的手。」
15 上主就降瘟疫佇以色列，對但到別是巴，對清早到預定的時，人民總共死七萬人。
16 當天使伸手欲滅耶路撒冷的時，上主改變心意，無欲繼續降此個災禍，就給啲執行毀滅的天使講：「停手！夠額啦！」彼時，上主的使者抵佇耶布斯人亞勞拿的五穀場。
17 大闢看見殺害人民的天使，就對上主講：「上主啊，我有犯罪，背逆的是我；毋拘諸個無辜的人民有做什麼毋著？求你的手刑罰我及我的家族。」
大闢為上主起一座祭壇
18 ( 代上 21:18-27 )
仝彼日，迦得來見大闢，對伊講：「你去耶布斯人亞勞拿的五穀場，佇遐為上主起一座祭壇。」
19 大闢就照上主吩咐迦得的話上去。
20 亞勞拿看著對面有王及伊的人臣啲來，就出去，仆佇土腳拜王。
21 亞勞拿講：「我的主我的王來僕人遮有什麼貴事？」
大闢講：「我來是欲買你此個五穀場，為上主起一座祭壇，互全國的瘟疫停止。」
22 亞勞拿對大闢講：「我的主我的王，照你所看做好的攏提去獻。遮有牛，通做燒化祭，有拍五穀的器具及牛軛通做柴燒。
23 王啊，亞勞拿將諸個攏送互王。」亞勞拿閣對王講：「願上主 — 你的上帝接納你。」
24 王對亞勞拿講：「毋通，我欲照價錢給你買。我無愛用白白得著的物做燒化祭獻互上主 — 我的上帝。」大闢就用五百七十公克的銀買彼個五穀場及牛。
25 大闢佇遐為上主起一座祭壇，獻燒化祭及平安祭。按呢，上主聽𪜶為著全國的祈禱，瘟疫就佇以色列中停止。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。