上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
30 蕾潔看見家己無給雅各生子，就怨妒伊的大姊。伊對雅各講：「你著子互我；若無，我欲死。」
2 雅各對蕾潔受氣，講：「互你𣍐生的是上帝，我豈會當代替上帝？」
3 蕾潔講：「我的女婢辟拉佇遮；你去及伊同房，互伊替我生子；我就通對伊得著子。」
4 蕾潔將伊的女婢辟拉互雅各做某；雅各就及伊同房。
5 辟拉懷孕，給雅各生一個子。
6 蕾潔講「上帝替我主持公道，聽我的祈禱，互我有子」，就給伊號名叫做但。
7 蕾潔的女婢辟拉閣懷孕，給雅各生第二個子；
8 蕾潔講「我及我的大姊相爭，我較贏」，就給伊號名叫做拿弗他利。
9 麗亞看見家己無閣生，就將伊的女婢悉帕互雅各做某。
10 麗亞的女婢悉帕給雅各生子。
11 麗亞講：「好佳哉！」伊就給囝仔號名叫做迦得。
12 麗亞的女婢悉帕閣給雅各生第二個子。
13 麗亞講：「我有福氣！眾女子會講我是有福氣的查某人。」伊就給囝仔號名叫做亞設。
14 收割小麥的時，呂便佇園裡得著催情果，提來互伊的老母麗亞。蕾潔對麗亞講：「請將你的子的催情果互我。」
15 麗亞對伊講：「你搶我的丈夫，豈猶無夠？欲閣搶我的子的催情果是無？」
蕾潔講：「為著你的子的催情果，今暝互雅各及你做夥睏。」
16 日暗，雅各對園裡倒來；麗亞出去接伊，給伊講：「你著及我睏，因為你是我用我的子的催情果交換來的。」彼暝雅各就及伊做夥睏。
17 上帝聽麗亞的祈禱，伊就懷孕，給雅各生第五個子。
18 麗亞講「上帝報賞我，因為我將女婢互我的丈夫」，就給伊號名叫做以薩迦。
19 麗亞閣懷孕，給雅各生第六個子。
20 麗亞講：「上帝賞賜我寶貴的禮物；我的丈夫欲看重我，因為我給伊生六個子。」麗亞就給伊號名叫做西布倫。
21 後來，麗亞生一個查某子，給伊號名叫做底拿。
22 上帝數念蕾潔，聽伊的祈禱，互伊會生。
23 伊就懷孕生子；講「上帝除去我的見笑」，
24 就給伊號名叫做約瑟，講：「願上主閣加添我一個子。」
雅各及拉班談判
25 蕾潔生約瑟了後，雅各對拉班講：「請互我倒去我的故鄉，
26 嘛請你將我服事你所得著的某子攏互我，互阮倒去；我按怎出力服事你，你攏知。」
27 拉班給伊講：「你若看我有夠重，請繼續及我住，因為我對卜卦知，上主因為你的緣故有賜福我。」
28 伊閣講：「請給我講，我著互你偌多工錢，我就互你。」
29 雅各給伊講：「我按怎服事你，我按怎照顧你的牲生，你攏知。
30 我猶未來以前，你所有的真少，現在加添真多；我無論去叨位，上主攏隨啲給你祝福。今，底時我才會當為著我家己的家庭建置家業？」
31 拉班講：「我著什麼互你？」
雅各講：「你什麼攏毋免互我。有一項代誌你若答應，我就猶原顧守，飼你的羊群。
32 今仔日互我巡你所有的羊群，將綿羊中間有點有斑的，及烏色的綿羊仔，以及山羊中有斑有點的，攏分出來做我的工錢。
33 以後你來看我所得的工錢，若山羊無斑無點的，綿羊仔毋是烏色的，就算是我偷的；用按呢來證明我的誠實。」
34 拉班講：「好，照你講的。」
35 彼日，拉班就將有斑有條紋的山羊、有斑有點插著白色的山羊母，以及烏色的綿羊仔，攏分出來交互伊的子。
36 伊互家己及雅各相離有三日的路程；雅各就顧拉班其他的羊。
37 雅各提楊樹、杏樹，及楓樹青閣軟的枝，剝一部份的皮，互內面白色的條紋露出。
38 伊將剝皮的枝插佇羊飲水的水溝及水槽，互𪜶及羊相對；羊來飲水的時，公母交合。
39 羊佇枝的對面交合，就生有斑、有點、有條紋的。
40 雅各將綿羊仔分出來，互𪜶面向拉班有條紋及烏色的羊。伊將家己的羊另外放佇一個所在，無及拉班的羊摻插。
41 勇壯的羊交合的時，雅各用樹枝插佇水溝內，互羊面對樹枝交合。
42 毋拘消瘦的羊交合的時，伊就無插樹枝；按呢，消瘦的歸拉班，勇壯的歸雅各。
43 對按呢，雅各非常好額，有真多羊群、女婢、僕人、駱駝，及驢。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。