上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
7
上帝及大闢立約
( 代上 17:1-15 )
王住佇王宮，上主互伊無受四圍對敵的攪擾，享受太平。
2 王對先知拿單講：「你看，我住佇柏香柴的宮殿，毋拘上帝的約櫃𫢶佇布棚。」
3 拿單對王講：「你想欲按怎，就通去做，因為上主及你同在。」
4 彼暝上主的話臨到拿單，講：
5 「你去給我的僕人大闢講：『上主按呢講：你真正欲起聖殿互我住是無？
6 對我導以色列人出埃及到現在，我毋曾住佇殿裡，攏一直住佇布棚抑是會幕，及𪜶做夥行徙。
7 我及以色列人同行的時，豈曾對叨一個以色列支族的領袖，就是牧養我的子民的講：恁哪無給我起柏香柴的殿？』
8 「今你著給我的僕人大闢講：『上主 — 萬軍的統帥按呢講：我對牧場揀召你，互你無閣飼羊，是欲互你做我的子民以色列的統治者。
9 你無論去叨位，我會及你同在，消滅你面前所有的對敵。我一定互你有大名聲，親像世間的偉人赫呢出名。
10-11 我欲為著我的子民以色列準備一個所在，給𪜶安頓，互𪜶徛起佇家己的所在，無閣受攪擾，無閣親像早前我命令士師管理我的子民以色列的時代，受兇惡的人欺壓。我欲互你脫離一切的對敵，得著太平。我閣宣布，我上主欲建立你的王朝。
12 到你的歲壽滿，轉去你的祖先遐的時，我欲選立你的後代，你的親生子，來續接你，閣欲互伊的國穩固。
13 伊欲為著我的名起聖殿；我欲堅固伊的王位直到永遠。
14 我欲做伊的父，伊欲做我的子。伊若犯罪，我欲用人的柺，世間人的鞭，責督伊。
15 毋拘我的慈愛𣍐離開伊，𣍐親像我互慈愛離開我所棄拺的掃羅。
16 你的家及你的國，會永遠堅立佇我的面前；你的王位會堅固到永遠。』」
17 拿單就照上帝啟示的話攏給大闢講。
大闢的祈禱及感謝
18 ( 代上 17:16-27 )
大闢王就入去會幕，坐佇上主的面前，講：「至高的上主，我是啥人，我的家算什麼，你竟然導我到此個地位？
19 毋若按呢，至高的上主啊，你閣眷顧你奴僕的家的將來；至高的上主，這豈是一般人會當抵著的代誌？
20 至高的上主啊，你的奴僕你上清楚，我猶有什麼話通講？
21 你有做諸個大事，閣教導你的奴僕；這攏是因為你的應允，照你的旨意。
22 至高的上主啊，你真偉大！照阮所聽見，無一個會當及你比，你以外無上帝。
23 世間豈有一個國親像你的子民以色列？上帝你有救贖𪜶，互𪜶成做你的子民，互你家己得著榮耀；閣為著你對埃及解救出來的子民做大閣通驚的事，將列邦及許個神明趕出去。
24 你有建立以色列永遠做你家己的子民；上主啊，你閣做𪜶的上帝。
25 「主上帝，你對你的奴僕及伊的家的應允，願你照你所講的實現，互伊永遠穩固。
26 願人永遠尊崇你的名講：『上主 — 萬軍的統帥是治理以色列的上帝！』閣你的奴僕大闢的家欲佇你的面前堅立。
27 上主 — 萬軍的統帥、以色列的上帝啊，因為你有啟示你的奴僕，講『我欲建立你的王朝』，所以你的奴僕好膽用此個祈禱對你懇求。
28 「至高的上主，只有你是上帝！你的話真實可靠；你用此個福氣應允你的奴僕。
29 今，求你歡喜賜福你奴僕的家，互伊佇你的面前永遠穩固。至高的上主，因為你有應允，願你奴僕的家對你得著福氣，到永遠。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。