上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
21
大闢逃避掃羅
大闢去挪伯見祭司亞希米勒。亞希米勒驚驚惶惶出來見大闢，對伊講：「你哪家己一個，無人及你鬥陣？」
2 大闢應講：「王互我一個任務，命令講此個任務毋通互人知。我已經派部下佇某一個所在聽候我。
3 今你有什麼通食，請你互我五個餅，抑是別項食物。」
4 祭司應講：「我手內無普通的餅，只有分別作聖的餅；你的部下無親近婦女才通食。」
5 大闢講：「最近阮攏無親近婦女。阮出去執行任務的時，諸個軍兵攏有潔淨。連平常都按呢，何況此遍的任務特別，軍兵的身軀閣較有保持潔淨。」
6 祭司就提分別作聖的餅互大闢，因為佇遐無別項餅，只有獻祭的餅，是獻新餅的時對上主面前換落來的。
7 彼日，佇遐有一個掃羅的人臣留佇上主的面前；伊是以東人，叫做多益，是掃羅的牧者的總管。
8 大闢問亞希米勒講：「你遮有槍抑是刀無？因為王的任務真緊急，我煞無帶刀抑是其他的武器。」
9 祭司應：「遮有一支刀，是你以前佇以拉的山谷所刣死的非利士人歌利亞的，用布包啲，囥佇以弗得的後面。你欲用就攑去；此支以外無別支。」
大闢講：「此支刀互我，無別支比此支較好。」
10 彼日大闢離開，走到迦特王亞吉遐，去閃避掃羅。
11 亞吉許個人臣對伊講：「此個豈毋是以色列國的王大闢？豈毋是眾婦女那跳舞那唱講
『掃羅刣死千千；
大闢刣死萬萬』
彼個大闢？」
12 大闢聽著諸個話心內不安，真驚迦特王亞吉，
13 所以佇眾人面前假起𤞚，佇城門的門扇亂寫亂畫，嘴涎波噴甲歸嘴鬚。
14 亞吉給伊的人臣講：「恁看，此個人啲起𤞚。恁哪給伊導來我遮？
15 我遮豈有欠𤞚人？恁哪給導來？毋通互此個人入我的厝。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。