上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
17
歌利亞挑戰以色列人
非利士人聚集軍隊欲交戰；𪜶佇猶大的梭哥集合，佇梭哥及亞西加中間的以弗‧大憫紮營。
2 掃羅及以色列人嘛聚集，佇以拉的山谷紮營，排陣欲對抗非利士人。
3 非利士人及以色列人分別佇兩旁的山排陣，中間有山谷隔開。
4 有一個非利士勇士迦特人歌利亞對營內行出來，向以色列人挑戰；伊高三公尺較加，
5 頭殼戴銅的頭盔，身軀穿有鱗的戰甲，戰甲重五十七公斤，
6 大腿用銅的甲保護，肩頭揹一支銅的槍；
7 槍的柄親像織布機的車心赫粗；干焦槍的頭的鐵就有七公斤重；伊的頭前有一個人給伊夯盾牌。
8 伊徛啲，對以色列軍隊喝講：「恁排陣欲創啥？我是非利士的勇士，恁是掃羅的部下。恁揀一個人落來遮，
9 伊若有才調及我鬥輸贏，閣給我刣死，阮就做恁的奴才；伊若互我刣死，恁就做阮的奴才服事阮。」
10 彼個非利士人閣講：「今仔日我對以色列軍隊嗆聲；好膽派一個及我拼生死！」
11 掃羅及以色列軍兵聽著非利士人諸個話，攏真懍，真驚。
12 大闢是猶大 伯利恆的以法他人耶西的子。耶西有八個子。掃羅作王的時，耶西年歲多，已經老。
13 耶西三個較大漢的子攏隨掃羅出征；上大的叫做以利押，第二的亞比拿達，第三的沙瑪。
14 大闢是煞尾子；彼三個兄哥跟隨掃羅的時，
15 大闢為著欲飼𪜶老父的羊群，佇伯利恆及掃羅遐來來去去。
16 彼個非利士人早暗出來挑戰，有四十日久。
17 有一日，耶西給伊的子大闢講：「你緊將焙好的麥穗十公斤，及十個餅提去軍營互恁兄哥；
18 閣帶十塊起司，送互𪜶的指揮官。去看恁兄哥有平安無，續帶證據轉來。
19 掃羅及恁三個兄哥，以及以色列眾人，佇以拉的山谷及非利士人啲交戰。」
20 第二日透早，大闢將羊群交互別人顧，就照耶西的吩咐帶食物去到軍營；彼時軍隊抵仔出去戰場，喝聲欲交戰。
21 以色列人及非利士人攏排陣相對。
22 大闢給物件交代顧守的人，就走去戰場，給伊的兄哥請安。
23 伊及𪜶講話的時，看著彼個非利士的勇士迦特人歌利亞對營內出來，給以色列人講仝款的話；大闢攏有聽著。
24 以色列眾人一下看著彼個人就驚惶逃走。
25 以色列人講來講去：「彼個行出來的人，恁有看著無？伊出來給以色列人嗆聲。給伊刣死的人，王有一大筆獎金欲互伊，嘛欲將查某子嫁互伊，閣互𪜶老父全家免納稅金，免服事王。」
26 大闢問徛佇伊身邊許個人：「刣死彼個非利士人，洗除以色列的見笑此個人會得著什麼？彼個無受割禮的非利士人是啥人，閣敢給永活上帝的軍隊嗆聲！」
27 軍兵就照前的話給大闢回答，講刣死彼個人的，會當得著什麼報賞。
28 大闢的大兄以利押聽著大闢及人講話，就對伊發受氣，講：「你哪來遮？曠野彼幾隻羊你放互啥人顧？我知，你假𠢕；你啲想啥我攏知。你來是欲看人相刣。」
29 大闢講：「我無做什麼，問一下也𣍐用得噢？」
30 大闢就離開去尋別人，問仝款問題，軍兵嘛用仝款的話應伊。
31 有人聽著大闢講的話，就去給掃羅報告；掃羅就派人叫大闢來。
32 大闢給掃羅講：「咱毋免驚彼個非利士人，請互你的僕人去及伊決鬥。」
33 掃羅對大闢講：「你無法度及此個非利士人決鬥；你猶少歲，毋拘伊對少年就做戰士。」
34 大闢給掃羅講：「我給阮老父顧羊的時，有獅抑是熊來咬羊仔；
35 我就給趇，給拍，將羊仔對𪜶的嘴救出來。獅抑是熊若欲咬我，我就摠伊的嘴鬚，給伊拍死。
36 我曾拍死獅及熊；此個無受割禮的非利士人，我嘛欲按呢給拍死，因為伊藐視永活上帝的軍隊。」
37 大闢閣講：「上主有救我脫離獅及熊的爪，伊嘛會救我脫離此個非利士人的手。」
掃羅給大闢講：「你去，上主及你同在。」
38 掃羅就用家己的軍服互大闢穿，用銅的頭盔互伊戴，閣互伊穿戰甲。
39 大闢給刀縖啲。因為伊無慣勢穿諸個，就試行看覓咧，然後給掃羅講：「穿諸個我行𣍐去，因為𣍐慣勢。」大闢就攏褪起來。
40 大闢手攑柺仔，去溪邊揀五粒光滑的石頭，囥佇伊顧羊啲用的袋仔，手提挕索，然後行倚彼個非利士人。
41 像時，彼個非利士人嘛行倚大闢；攑盾牌的兵行佇頭前。
42 彼個非利士人看著大闢，就看輕伊；因為伊少年，紅膏赤蠘，生做英俊。
43 彼個非利士人對大闢講：「我豈是狗？你攑柺仔欲創啥？」非利士人就指家己的神明咒詛大闢。
44 彼個非利士人閣給大闢講：「來，我欲用你的肉飼鳥仔及野獸。」
45 大闢對彼個非利士人講：「你是攑刀，攑長槍、短槍來攻擊我；我是奉上主 — 萬軍的統帥的名，就是你所藐視以色列軍隊的上帝，來攻擊你。
46 今仔日上主欲將你交佇我的手；我欲給你刣死，給你斬頭。今仔日我欲用非利士軍兵的身屍飼鳥仔及野獸，互全世界的人攏知以色列有上帝；
47 閣互所有聚集佇遮的人攏知，上主互人得勝毋是用刀，毋是用槍。交戰的勝敗上主啲決定；伊欲將恁交佇阮的手。」
48 歌利亞行進前欲攻擊大闢。大闢趕緊走進前去迎戰。
49 大闢對袋仔內提一粒石頭出來，用挕索挕去，抌著歌利亞的頭額，石頭鑽入頭額，伊就倒落去，面仆佇地裡。
50 按呢，大闢無用刀，只有用挕索及石頭就拍死歌利亞。
51 大闢走去，踏佇歌利亞的身軀頂，然後將伊的刀拔出來，給伊刣死，斬斷伊的頭。非利士人看著𪜶的勇士已經死，就攏逃走。
52 以色列人及猶大人就那喝喊那追殺非利士人，追到迦特及以革倫的城門；對沙拉音到迦特及以革倫，沿路攏是屍體。
53 以色列人追殺非利士人了後，倒轉來搶奪𪜶的營地。
54 大闢將歌利亞的頭帶到耶路撒冷，毋拘給伊的軍器囥佇家己的布棚。
掃羅召見大闢
55 掃羅看著大闢去迎戰非利士人的時，問元帥押尼珥講：「押尼珥，彼個少年人是啥人的子？」
押尼珥講：「我指王的性命咒誓，我毋知。」
56 王講：「你去問看彼個少年人是啥人的子。」
57 大闢拍死歌利亞倒來，押尼珥就導伊來見掃羅，伊的手猶捾歌利亞的頭。
58 掃羅問伊講：「少年人，你是啥人的子？」
大闢講：「我是你的僕人伯利恆人耶西的子。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。