上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
3
上主對撒母耳顯現
囝仔撒母耳受以利教導服事上主。當時真罕得有對上主來的信息，無常常有啟示。
2 有一暝，以利佇家己的房間啲睏；伊的目睭已經霧，看𣍐明。
3 撒母耳佇囥上帝約櫃的殿內嘛啲睏；天猶未光，上帝的燈猶啲𤏸。
4 上主叫撒母耳；撒母耳應講：「我佇遮。」
5 伊就走去以利遐，講：「我佇遮，你叫我乎？」
以利講：「我無叫你，倒去睏。」伊就去睏。
6 上主閣叫撒母耳；撒母耳起來，去以利遐，講：「我佇遮，你叫我乎？」
伊應講：「我的子，我無叫你，倒去睏。」
7 彼陣撒母耳毋識上主；上主的話猶未對伊啟示。
8 上主第三遍叫撒母耳。撒母耳起來，去以利遐，講：「我佇遮，你叫我乎？」
以利才知是上主啲叫囝仔。
9 以利就給撒母耳講：「你閣去睏。伊若閣叫你，你就講：『上主啊，請你講，你的奴僕啲聽。』」撒母耳就閣倒去睏。
10 上主閣來徛啲，親像前幾若遍按呢叫：「撒母耳，撒母耳。」
撒母耳應講：「請講，你的奴僕啲聽。」
11 上主給撒母耳講：「注意聽，我欲佇以色列人中間做一項代誌，互聽著的人攏驚一趒。
12 佇彼日，關係以利的家我所講的代誌攏會實現。
13 我有給伊講，我欲永遠審判𪜶此家；伊知伊的子有犯應該受咒詛的罪，閣無給𪜶譴責。
14 所以我對以利的家咒誓：『以利𪜶此家的罪用牲禮祭物嘛𣍐當得著赦免。』」
15 撒母耳睏到天光，開上主的殿門。撒母耳毋敢將異象給以利講。
16 以利叫撒母耳，講：「我的子撒母耳。」
伊應講：「我佇遮。」
17 以利講：「上主對你講什麼？你毋通給我隱瞞；你若將伊給你講的對我掩蓋一句，願上帝加倍給你責罰。」
18 撒母耳就將許個話攏給以利講，無對伊隱瞞。以利講：「伊是上主。上主會照伊看做好的去做。」
19 撒母耳漸漸大漢；上主及伊同在，互伊所講的話逐句攏實現。
20 對但到別是巴，所有的以色列人攏知撒母耳確實是上主的先知。
21 上主繼續佇示羅顯現。上主佇示羅用伊的話啟示撒母耳。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。