上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記上
2
哈娜的祈禱
哈娜祈禱講：
我的心因為上主歡喜；
我的頭因為上主攑高高；
我的嘴敢向對敵誇耀，
因為你的拯救互我快樂。
2 只有上主至聖，
你以外無別個；
咱的上帝是唯一的保護者。
3 人毋通自高講驕傲的話；
毋通自誇講大話，
因為上主是無所不知的上帝，
人的行為受你評鑑。
4 勇士的弓已經受遏折；
軟弱的人得著氣力。
5 富足的著互人倩才有通食；
枵餓的無閣枵。
𣍐生育的生七個；
有真多子的到尾無賰半個。
6 上主互人死，亦互人活；
互人落陰間，亦互人起來。
7 上主互人散赤，亦互人好額；
互人降低，亦互人高升。
8 伊對塵埃提拔困苦的人，
對糞埽堆高升欠缺的人，
互𪜶及尊貴的人坐做夥，
互𪜶坐大位。
大地的根基上主建立；
伊將世界安置佇彼頂面。
9 伊保守伊忠信子民的腳步，
互歹人佇烏暗中消失；
人𣍐當靠家己的氣力較贏。
10 敵對上主的人會受拍碎；
伊欲對天用雷摃𪜶。
上主欲審判全世界。
伊欲賜氣力互伊的君王，
互伊所揀選的頭攑高高。
11 以利加拿倒去伊佇拉瑪的厝。囝仔撒母耳受祭司以利指導，服事上主。
以利的兩個子
12 以利兩個子是匪類，藐視上主，
13 無守祭司取獻祭的肉的規定。人獻祭肉啲煮的時，祭司的僕人就來，攑三爪的肉叉，
14 插入鍋仔鼎仔，鐕出來的肉祭司就提去。彼時，祭司對來示羅獻祭的以色列人攏按呢做。
15 毋若按呢，肉油猶未燒以前，祭司的僕人就來，給獻祭的人講：「肉一寡提來去互祭司烘；伊無愛煮過的肉，愛生的。」
16 獻祭的人若講：「油燒了，肉才照你所愛的提去。」
祭司的僕人就講：「𣍐用得，隨時互我；若毋，我欲強提去。」
17 以利兩個子的罪佇上主眼中非常嚴重，因為𪜶藐視獻互上主的祭物。
撒母耳佇示羅
18 彼時撒母耳猶細漢，穿幼麻布的以弗得祭司服啲服事上主。
19 伊的老母逐年給伊做一領細領外袍，及伊的丈夫上來獻年祭的時，帶來互伊。
20 以利給以利加拿及伊的某祝福，講：「願上主對此個婦仁人閣賜你子兒，來補你獻互上主此個囝仔。」
𪜶就倒去𪜶兜。
21 上主賜福哈娜，互伊閣生三個後生、兩個查某子。囝仔撒母耳繼續服事上主，日日大漢。
以利警告伊的子
22 以利已經真老，聽著伊的子對以色列眾人所做的代誌，閣聽著𪜶及會幕門口做工的婦仁人做夥睏。
23 以利給𪜶講：「恁是按怎做此款歹代誌？我對上主的子民聽著恁的歹行為。
24 我的子啊，毋通按呢。我有聽著上主的子民對恁的風評真僫。
25 人得罪人，上帝會給伊審判；人若得罪上主，啥人會當替伊辯護？」
毋拘𪜶毋聽老父的話，因為上主已經決定欲刣𪜶。
26 囝仔撒母耳日日大漢，上主及人愈疼伊。
預言以利家的災禍
27 有一日，有一個上帝重用的人來見以利，對伊講：「上主按呢講：『恁祖先做埃及王的奴隸的時，我有對𪜶顯現。
28 我對以色列眾支族揀亞倫的家做我的祭司，佇我的祭壇獻祭，燒香，穿以弗得祭司服服事我。以色列人用火燒獻互我的祭物，我攏有分互恁祖先。
29 我所命令佇我的厝獻的牲禮祭物，恁是按怎給𪜶踐踏？你看重你的子較過頭尊重我；竟然准𪜶對我的子民以色列獻的祭物，提上好的份去食甲肥滋滋？』
30 「所以上主 — 以色列的上帝講：『我雖然曾應允，你的家及你的宗族會永遠服事我，毋拘現在我上主決定無欲照按呢對待恁；因為尊重我的，我欲尊重伊；藐視我的，欲受看輕。
31 看，日子啲欲到，我欲斬斷你及你的宗族的手骨，按呢你的家族無人會長歲壽。
32 佇我賜福互以色列人的時，你顛倒會看見你的厝衰敗；你的家族無人會長歲壽。
33 我會給你留一個後代佇我的祭壇服事，毋拘你的目睭會失明，心絕望；其他的後代攏會早死。
34 你兩個子何弗尼及非尼哈會仝一日死，這證明我對你講的話一定實現。
35 我會為家己設立一個忠實的祭司，伊會照我的心意做代誌。我會為著伊建立穩固的家；伊會一世人服事我所選立的王。
36 你的後代所賰的人攏會對伊求乞討食，講：求你互我參與祭司的工作，互我通度三頓。』」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。