上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
路得記
4
波阿斯娶路得做某
波阿斯來城門口，坐落去；伊所講彼個至親抵抵經過。伊就講：「兄弟啊，請過來遮坐。」彼個人就越轉來坐。
2 波阿斯閣請城內十個長老來，給𪜶講：「請遮坐。」𪜶就坐啲。
3 波阿斯就對此個至親講：「對摩押地轉來的拿俄美欲賣咱的兄弟以利米勒彼塊地。
4 我想我著給你講，你著佇坐佇遮的人及民間的長老面前買轉來。你若欲盡義務給伊買轉來，就互你買；若毋，著給我講，互我知。因為無人比你閣較有權通買轉來，閣來才輪著我。」
彼個人就講：「我欲盡義務給買轉來。」
5 波阿斯講：「你對拿俄美的手買地的時，嘛著娶死去的人的某摩押女子路得做某，通替此個死去的人的家族保留此塊土地。」
6 此個至親就講：「若按呢我毋買，才免枉費我家己的產業。讓你買，互你盡義務，我無欲買。」
7 照以色列古早的風俗，人欲確定贖回抑是交換產業的手續，著褪鞋交互對方。以色列人用按呢做合約的證據。
8 彼個至親就給波阿斯講：「互你買。」伊就褪鞋互波阿斯。
9 然後，波阿斯對眾長老及所有的人講：「今仔日恁是證人，我對拿俄美的手買一切屬以利米勒、瑪倫，及基連的產業。
10 我嘛欲娶瑪倫的某摩押女子路得做某，通替死去的人保留伊家族的產業，才免伊對家族及本籍受除名。今仔日恁攏是證人。」
11 所有佇城門口的人及眾長老攏講：「阮是證人。願上主互你娶入門的某，親像蕾潔及麗亞建立雅各的家。願你佇以法他成做大財主，佇伯利恆有好名聲。
12 願你的家，就是上主通過此個女子賞賜你的後代，親像她瑪及猶大所生法勒斯的家像款。」
大闢的家譜
13 波阿斯就娶路得做某。波阿斯及伊同房；上主互伊懷孕，伊就生一個子。
14 婦仁人攏來給拿俄美講：「願上主得著稱讚，因為伊今仔日互你一個會當繼承你的產業閣照顧你的人。願此個囝仔佇以色列有好名聲。
15 願伊回復你的元氣，佇你年老的時給你奉養，因為伊是疼你的新婦生的。此個新婦比七個子較好。」
16 拿俄美就抱此個囝仔佇胸前，成伊大漢。
17 厝邊的婦仁人講：「拿俄美得著一個子啦。」𪜶就給伊號名叫做俄備得；伊就是耶西的老父，耶西是大闢的老父。
18 這是法勒斯的後代：法勒斯生希斯崙，
19 希斯崙生蘭，蘭生亞米拿達，
20 亞米拿達生拿順，拿順生撒門，
21 撒門生波阿斯，波阿斯生俄備得，
22 俄備得生耶西，耶西生大闢。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。