上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
19
利未人及伊的細姨
以色列無王的時，有一個利未人住佇以法蓮山區偏僻的所在。伊娶一個猶大 伯利恆的女子做細姨。
2 此個細姨受氣伊的丈夫，就離開丈夫，倒去後頭厝，佇遐住四月日久。
3 伊的丈夫帶一個奴僕及兩隻驢出發去尋伊，欲給伊姑情，導伊倒去。伊的丈夫到位，伊就導伊的丈夫入去老父的厝。利未人的丈人看著，就歡迎伊。
4 彼個丈人給伊留落來；伊就佇遐住三日，做夥飲食。
5 到第四日，𪜶透早起來，利未人欲出發；彼個丈人給子婿講：「請你食一寡物件，加添氣力，才出發。」
6 兩個人就坐落來，做夥飲食。彼個丈人對伊講：「請你閣住一暝，閣放鬆一下。」
7 彼個人起來欲出發，伊的丈人閣強強留伊；伊就閣歇一暝。
8 到第五日，利未人透早起來欲出發，丈人給伊講：「請閣食一寡物件，加添氣力，聽候到日欲落山。」伊就留落來及丈人做夥食。
9 彼個人及伊的細姨，以及奴僕起來欲出發；伊的丈人給伊講：「你看，日欲暗啊，請你閣歇一暝；日欲落啦，你著歇遮閣放鬆一下；明仔載透早才起身倒去恁兜。」
10 彼個人毋愛閣歇一暝，就導伊的細姨及兩隻準備好勢的驢出發，來到耶布斯的對面；耶布斯就是耶路撒冷。
11 𪜶行近耶布斯的時，日已經欲落山；奴僕對主人講：「咱斡入去耶布斯人的城，𫢶遐歇暝好無？」
12 伊的主人講：「咱無欲斡入去毋是以色列人啲住的外邦人的城；咱過來基比亞。」
13 伊閣給奴僕講：「來，咱看是欲去基比亞，抑是拉瑪過暝。」
14 𪜶就繼續行；欲到便雅憫的基比亞的時，日頭已經落山。
15 𪜶就斡入去，欲佇基比亞歇暝。𪜶入城，坐佇廣場，因為無人接待𪜶入去厝裡歇暝。
16 日暗，有一個老人對野外做工倒來。伊是以法蓮山區的人，住佇基比亞；基比亞是便雅憫人住的所在。
17 彼個老人攑頭看著有出外人佇城內的廣場，就問伊講：「你對叨位來，欲去叨位？」
18 伊應講：「阮對猶大的伯利恆來，欲去以法蓮山區偏僻的所在；我是遐的人，去猶大的伯利恆，現在欲轉去阮兜；毋拘佇遮無人接待我去𪜶兜。
19 我有草料互驢，嘛有餅及酒互我，及我的細姨，以及侍候我的少年人，攏無欠什麼。」
20 老人講：「請你放心！恁欠用的我攏會設法。千萬毋通𫢶廣場過暝。」
21 伊就導𪜶去伊的厝，飼𪜶的驢；𪜶就洗腳飲食。
22 𪜶抵啲歡喜快樂的時，城內許個匪類來圍彼間厝，直直拍門，對厝主，彼個老人，講：「給入去恁兜彼個查甫人導出來，阮欲及伊交合。」
23 彼個厝主出來，對𪜶講：「朋友啊，按呢啦，毋通做此款歹代誌。此個人是我的人客，恁毋通做此款見笑事。
24 我有一個查某子，猶是在室女，閣有彼個人的細姨；我導𪜶出來，恁通給𪜶凌辱，出在恁的意思對待𪜶。毋拘，對此個人恁毋通做此款見笑事。」
25 毋拘許個人毋聽彼個老人的話；彼個利未人就掠伊的細姨給伊拺出去外面互𪜶。𪜶就給伊強姦，通暝凌辱伊，到隔日天欲光的時，才放伊去。
26 天昲光的時，婦仁人來到伊的丈夫歇暝彼間厝的門口，倒佇遐，直到天光。
27 伊的丈夫透早起來，開門，欲出發倒去𪜶兜，看著伊的細姨倒佇門口，兩支手靠佇戶橂。
28 伊對伊的細姨講：「起來，咱轉來去。」毋拘伊無回應，利未人給伊扶起去驢仔頂，就出發倒去𪜶兜。
29 轉去到𪜶厝，伊就提刀將伊的細姨切做十二塊，差人送去通以色列的全境。
30 所有看著的人攏講：「對以色列人出埃及到今仔日，此款代誌猶毋曾發生，嘛毋曾看過。今，咱著想，著參詳，著決定欲按怎做。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。