上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
14
參孫及亭拿的女子
參孫落去亭拿，佇遐看著一個女子，是非利士的查某囝仔。
2 參孫倒去給𪜶老父老母講：「我佇亭拿看著一個女子，是非利士的查某囝仔；請互我娶伊作某。」
3 伊的父母給伊講：「佇咱的宗族及同胞的中間，豈無查某囝仔？你哪欲娶無受割禮的非利士人的查某囝仔？」
參孫給伊的老父講：「我合意伊，我欲娶伊。」
4 伊的父母毋知此個代誌出佇上主，因為上主尋機會欲攻擊非利士人。彼時，非利士人管轄以色列人。
5 參孫及伊的父母落去亭拿。
參孫到亭拿的葡萄園的時，忽然抵著一隻少壯的獅對伊大聲哮。
6 上主的神大大充滿參孫；伊空手給獅拆裂，親像啲拆裂山羊仔。此項代誌參孫無給伊的父母講。
7 參孫落去及彼個女子講話，真合意伊。
8 過一段時間，伊倒去欲娶彼個女子做某；伊斡對路邊欲看彼隻伊拍死的獅，看著有一巢蜂及蜜佇獅的身屍內面。
9 伊穵蜜下佇手裡，那行那食；來到伊的父母遐，分互𪜶食，毋拘無給𪜶講蜜是對獅的身屍穵來的。
10 伊的老父落去彼個女子遐。參孫照彼所在作新郎的慣例，佇遐辦桌請人客。
11 非利士人看著參孫來，就導三十個人來陪伴伊。
12 參孫給𪜶講：「我現在欲出一個謎猜互恁；恁佇宴席的七日內若猜會出，我就欲互恁三十領幼麻布的內衫、三十套禮服；
13 恁若臆𣍐出來，恁著互我三十領幼麻布的內衫、三十套禮服。」
𪜶講：「請講你的謎猜互阮臆。」
14 參孫就講：
「食物對吞食的出；
甜物對強猛的出。」
𪜶三日久臆𣍐出。
15 到第四日，𪜶給參孫的某講：「你著給你的丈夫落話，互阮知謎猜的意思；若無，阮欲放火燒你及恁老父的厝。恁請阮來，是欲搶阮是無？」
16 參孫的某仆佇伊的肩頭頂啼哭講：「你是怨恨我，毋是疼我；因為你出謎猜互阮本族的人，卻無給我講答案。」
伊應講：「我連父母都無給𪜶講，哪通給你講？」
17 參孫的某佇伊的面前啼啼哭哭到宴席的第七日，參孫𣍐堪得伊逼，就給伊講；伊的某就將答案給伊本族的人講。
18 到第七日，日落以前，城內的人來給參孫講：
「有什麼比蜜較甜？
有什麼比獅較強？」
參孫給𪜶回答講：
「若無用我的細隻牛母犁田，
恁絕對臆𣍐出答案。」
19 上主的神大大充滿參孫，伊就落去亞實基倫，刣死三十人，搶𪜶的衫，提互臆著謎猜的人。參孫氣沸沸，倒去𪜶老父遐。
20 參孫的某煞嫁互伊的伴娶的中間的一個。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。