上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
25
亞伯拉罕其他的後代
( 代上 1:32-33 )
亞伯拉罕閣娶基土拉做某。
2 基土拉給伊生心蘭、約珊、米但、米甸、伊施巴，及書亞。
3 約珊生示巴及底但。底但的後代是亞書利人、利都是人，及利烏米人。
4 米甸的子是以法、以弗、以諾、亞比大、以勒大；諸個攏是基土拉的後代。
5 亞伯拉罕將伊一切所有的互以撒。
6 亞伯拉罕嘛趁伊猶活啲的時，將財物分互伊的細姨許個子，閣叫𪜶離開伊的子以撒去東旁的地。
亞伯拉罕死
7 亞伯拉罕一生活一百七十五歲。
8 亞伯拉罕食長歲壽，平平安安轉去伊的祖先遐。
9-10 伊的子以撒及以實瑪利將伊安葬佇幔利對面的麥比拉洞穴，是佇亞伯拉罕對赫人瑣轄的子以弗崙買來彼坵園的內面。亞伯拉罕及伊的某莎拉攏埋葬佇遐。
11 亞伯拉罕死了後，上帝賜福互伊的子以撒；以撒住佇比珥‧拉海‧萊附近。
以實瑪利的後代
12 ( 代上 1:28-31 )
下面是亞伯拉罕的子以實瑪利的後代：以實瑪利是莎拉的女婢埃及人夏甲給亞伯拉罕生的子。
13 以實瑪利諸個子照𪜶出世的順序寫佇下面：以實瑪利的大子尼拜約，閣有基達、亞德別、米比衫、
14 米施瑪、度瑪、瑪撒、
15 哈大、提瑪、伊突、拿非施、基底瑪；
16 諸個攏是以實瑪利的子，做十二族的族長。𪜶住的庄社及營地，攏照𪜶的名來號。
17 以實瑪利活一百三十七歲就過身，轉去伊的祖先遐。
18 伊的後代住佇對哈腓拉到埃及東旁的書珥，欲去亞述的路彼個地區；徛起佇伊親族的對面。
以掃及雅各出世
19 下面是亞伯拉罕的子以撒的後代：亞伯拉罕生以撒；
20 以撒四十歲的時娶麗百加做某。麗百加是美索不達米亞的亞蘭人彼土利的查某子，拉班的小妹。
21 以撒因為伊的某𣍐生，就為著伊祈求上主；上主應允伊的懇求，伊的某麗百加就懷孕。
22 兩個雙生仔佇麗百加的腹肚內相揢，互伊真艱苦；伊就講：「是按怎我著即艱苦？」伊就問上主。
23 上主給伊講：
兩國佇你的腹肚內；
兩族欲對你的身軀出；
一族欲比另外一族較強；
大的欲服事細的。
24 生產的時到，果然腹肚內是雙生仔。
25 代先出來的，身軀紅紅，歸身軀發毛親像穿皮衫；就給伊號名叫做以掃。
26 隨後，伊的小弟閣出來，手扭以掃的腳後蹬；就給號名叫雅各。兩個子出世的時，以撒抵仔六十歲。
以掃出賣大子的名份
27 兩個囝仔漸漸大漢；以掃𠢕拍獵，常常佇山野；雅各個性安靜，常常佇布棚內。
28 以撒疼以掃，因為常常食以掃拍來的野味。麗百加疼雅各。
29 有一日雅各啲炕湯，以掃對山野倒來，身軀真悿。
30 以掃給雅各講：「我悿甲欲死，拜託你將彼個紅紅的湯互我食。」因為按呢，以掃嘛叫做以東。
31 雅各講：「你先將大子的名份賣互我。」
32 以掃講：「我都枵甲欲死啊，此個大子的名份對我有啥路用？」
33 雅各講：「你著先咒誓。」
以掃就對伊咒誓，將大子的名份賣互伊。
34 雅各就將餅及紅豆湯互以掃；伊就食，食了就做伊去。按呢，以掃看輕伊大子的名份。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。