上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
4
底波拉及巴拉
以笏死了後，以色列人閣做上主看做歹的事。
2 上主將𪜶交互統治夏瑣的迦南王耶賓；伊的元帥是西西拉，住佇夏羅設‧哈歌印。
3 耶賓王有鐵的戰車九百台；伊殘忍欺壓以色列人二十年。以色列人哀求上主解救。
4 彼時有一個女先知底波拉，就是拉比多的某，做以色列的士師。
5 伊住佇以法蓮山區，拉瑪及伯特利的中間，底波拉的棕樹腳；以色列人攏去伊遐聽伊的判決。
6 底波拉派人去拿弗他利的基低斯叫亞比挪菴的子巴拉來，對伊講：「上主 — 以色列的上帝豈無命令你：『你著導拿弗他利人及西布倫人一萬及你去他泊山。
7 我欲互耶賓的元帥西西拉及伊的戰車、伊的全軍來到基順河你遮；我欲將𪜶交佇你的手。』」
8 巴拉給伊講：「你若欲及我做夥去，我就欲去；你若毋，我就毋去。」
9 伊講：「我一定會及你做夥去，毋拘你此遍出征𣍐互你得著榮光，因為上主欲將西西拉交佇一個婦仁人的手。」底波拉就及巴拉做夥去基低斯。
10 巴拉召集西布倫人及拿弗他利人到基低斯；隨伊去的有一萬人。底波拉嘛及伊做夥去。
11 彼時，摩西的丈人何巴的後代基尼人希百，離開其他的基尼人，來佇基低斯附近的撒拿音橡樹邊搭布棚住佇遐。
12 有人給西西拉講：「亞比挪菴的子巴拉已經上去他泊山。」
13 西西拉就召集伊攏總鐵的戰車九百台及全軍，對夏羅設‧哈歌印來到基順河。
14 底波拉對巴拉講：「進攻！今仔日上主將西西拉交佇你的手啦。上主佇你的頭前啲導你。」巴拉就對他泊山落來；隨伊的有一萬人。
15 上主互西西拉，以及伊所有的戰車及軍隊，受巴拉攻擊，混亂四散；西西拉落車，起腳逃走。
16 巴拉追趇許個戰車及軍隊，到夏羅設‧哈歌印；西西拉的全軍攏受刣死，無留甲半個。
17 西西拉起腳逃走，走到基尼人希百的某雅億的布棚，因為夏瑣王耶賓及基尼人希百的家關係真好。
18 雅億出來迎接西西拉，對伊講：「我的主，請入來我遮，毋免驚。」西西拉就入去伊的布棚。雅億就用毯仔給伊蓋啲。
19 西西拉給伊講：「我嘴焦，請你用一寡水互我飲。」雅億就開貯奶的皮袋互伊飲；猶原閣給伊蓋啲。
20 西西拉閣給伊講：「你徛𫢶布棚門口，若有人來問你：『有人來你遮無？』你著講『無。』」
21 西西拉厭倦睏重眠；希百的某雅億提布棚的杙仔，手攑槌仔，用跕的行去伊遐，用杙仔對伊的鬢邊釘入去，迵到土腳；伊就死。
22 彼時，巴拉追趇西西拉，雅億出來迎接伊，對伊講：「請來，我互你看你啲尋的人。」巴拉就及伊入去。巴拉看著西西拉已經倒佇土腳，死佇遐，杙仔猶釘佇伊的鬢邊。
23 對按呢，上帝互迦南王耶賓受以色列人制伏。
24 以色列人愈來愈強盛，贏過迦南王耶賓，最後將迦南王耶賓消滅。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。