上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
3
留落來的外族
上主留諸個族，是欲試驗許個毋曾經歷迦南戰爭的以色列人；
2 欲互以色列的後代，就是許個毋曾經歷戰爭的人，知閣學習交戰。
3 留落來的族，有五個非利士的領袖、所有的迦南人、西頓人，及住佇巴力‧黑門山及哈馬隘口中間的黎巴嫩山的希未人。
4 留諸個是欲用𪜶來試驗以色列人，看𪜶肯聽趁上主通過摩西命令𪜶列祖的誡命抑無。
5 對按呢，以色列人住佇迦南人、赫人、亞摩利人、比利洗人、希未人、耶布斯人的中間；
6 娶𪜶的查某子作某；嘛將查某子嫁互𪜶的子，續去服事𪜶許個神明。
俄陀聶
7 以色列人做上主看做歹的事，𣍐記得上主 — 𪜶的上帝，去服事諸個巴力及亞舍拉。
8 上主就對以色列人發大受氣，將𪜶交互美索不達米亞王古珊‧利薩田；以色列人服事古珊‧利薩田八年。
9 以色列人求叫上主，上主就為著𪜶興起一個拯救者解救𪜶，就是迦勒的小弟基納斯的子俄陀聶。
10 上主的神臨到伊，伊就做以色列的士師。伊出去交戰，上主將美索不達米亞王古珊‧利薩田交佇伊的手，伊就刣贏古珊‧利薩田。
11 彼個地區就太平四十年。後來，基納斯的子俄陀聶死。
以笏
12 以色列人閣做上主看做歹的事。因為𪜶按呢做，上主互摩押王伊磯倫強盛，攻打以色列人。
13 伊磯倫召集亞捫人及亞瑪力人來伊遐，去攻打以色列人，佔棕樹城耶利哥。
14 對按呢，以色列人服事摩押王伊磯倫十八年。
15 以色列人求叫上主，上主就為著𪜶興起一個拯救者，就是便雅憫人基拉的子以笏；伊慣勢用倒手。以色列人派伊去給摩押王伊磯倫進貢。
16 以笏拍一支雙面利的劍，長半公尺，縛佇正腿用衫蓋啲。
17 伊帶禮物去見摩押王伊磯倫；伊磯倫真大箍。
18 以笏獻禮物了後，就叫扛禮物的人倒去。
19 伊家己對倚近吉甲拍石像的所在越倒轉來對王講：「王，我有祕密的事欲給你報告。」
王講：「迴避！」許個侍候王的人就攏退出。
20 彼時王家己一個坐佇清涼的樓頂；以笏行倚去，對伊講：「上帝有話交代我給你講。」王就對座位徛起來。
21 以笏就伸倒手，對正腿拔劍出來，鑿入王的腹肚，
22 連劍的柄嘛續鑿入去；劍互油咬牢。以笏無將劍對王的腹肚拔出來，王的屎流出來。
23 以笏出來走廊，將樓頂的門關起來，鎖啲。
24 伊出去了，王的部下來，看著樓頂的門關啲閣鎖啲，就講：「伊一定是佇清涼的樓頂啲大便。」
25 𪜶聽候到心著急，看著伊無開樓頂的門，就攑鎖匙來開。唉啊，𪜶的主人竟然倒佇土腳，死佇遐。
26 佇𪜶拖延的時，以笏已經逃走，過拍石像的所在，走到西伊拉。
27 以笏到以法蓮山區的西伊拉，就歕哨角；以色列人對山區落去隨伊，伊就行佇𪜶的頭前領導𪜶。
28 伊對𪜶講：「恁來隨我，因為上主已經將恁的對敵摩押人交佇恁的手。」𪜶隨伊落去，攻取摩押對面的約旦河渡頭，毋准人過河。
29 彼日，𪜶刣死摩押人大約一萬，攏是強猛的勇士，無一個逃脫。
30 對按呢，摩押人就受以色列人制伏；彼個地區太平八十年。
珊迦
31 以笏以後，亞拿的子珊迦用趕牛的刺棍拍死六百個非利士人。伊嘛解救以色列人。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。