上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
2
上主的使者佇波金顯現
上主的使者對吉甲來到波金，對以色列人講：「我互恁對埃及出來，導恁來到我對恁的列祖立誓應允的地；我曾講：『我及恁立的約，我永遠𣍐違背；
2 恁嘛毋通及此所在的住民立約；著拆毀𪜶的祭壇。』恁竟然毋聽我的話！恁是按怎按呢做？
3 因為按呢，我給恁講：『我無欲對恁的面前給𪜶趕走；𪜶欲成做恁的對敵，𪜶的神明欲成做害恁的羅網。』」
4 上主的使者講諸個話了後，以色列眾人就大聲啼哭。
5 𪜶給彼所在號名叫做波金；𪜶佇遐獻祭互上主。
約書亞死
6 ( 書 24:28-31 )
約書亞解散以色列人；𪜶就倒去家己分著的家業，佔領許個土地。
7 約書亞活啲的時，人民服事上主；伊死了後，許個親目看著上主為以色列人所做偉大的事的長老猶活啲的時，人民猶原服事上主。
8 上主的僕人，嫩的子約書亞死，享年一百十歲。
9 以色列人給伊安葬佇以法蓮山區，迦實山北旁的亭拿‧西拉伊分著的土地。
10 彼代的人攏死了；後一代的人起來，𪜶毋識上主，嘛毋知伊為著以色列人所做的事。
以色列人棄拺上主
11 以色列人做上主看做歹的事，去服事巴力。
12 𪜶棄拺導𪜶出埃及的上主 — 𪜶列祖的上帝，去隨四圍外族的神明，給𪜶跪拜，惹上主受氣。
13 以色列人棄拺上主，去服事巴力及亞斯她錄。
14 上主對𪜶發大受氣，將𪜶交互搶掠𪜶的人；伊閣將𪜶交互四圍的對敵，以色列人就𣍐當抵抗𪜶的對敵。
15 𪜶逐遍出戰，上主攏照伊所講所立誓的，降災禍攻擊𪜶；𪜶就非常困苦。
16 上主興起士師，士師就解救人民脫離搶掠𪜶的人的手。
17 毋拘𪜶無聽趁𪜶的士師，竟然背叛上主，去隨別個神明給𪜶跪拜；𪜶的列祖順趁上主的命令所行的路，𪜶真緊偏離，無照按呢行。
18 上主逐遍為著𪜶興起士師，伊攏及士師同在；佇士師猶活啲的時，上主救人民脫離對敵的手。𪜶受壓制，哀呻吐氣的時，上主就憐憫𪜶。
19 士師死了後，𪜶越轉去作歹，比𪜶的列祖閣較嚴重；隨別個神明，給𪜶服事跪拜，硬心毋放棄所做的歹及敗壞的行為。
20 上主就對以色列人受氣，講：「此個子民違背我命令𪜶的列祖應該守的約，毋聽趁我的話，
21 所以，約書亞死的時留落來的外族人，我連一族都無欲給𪜶趕走；
22 用諸個外族人來試驗以色列人，看𪜶肯親像𪜶的列祖遵行上主的道路抑無。」
23 所以，上主留諸個族，無將𪜶交互約書亞，嘛無佇約書亞死了後真緊給𪜶趕走。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。