上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
14
分配約旦河西旁的土地
下面是以色列人佇迦南地，就是約旦河西旁，所得著的家業，是祭司以利亞撒及嫩的子約書亞，以及以色列逐支族的族長，分互𪜶的。
2 𪜶照上主對摩西的命令，抽籤分配互九個支族閣半支族的土地。
3 摩西佇約旦河東旁，已經將兩個支族閣半支族的家業分互𪜶，毋拘無分家業互利未人；
4 約瑟的後代分做瑪拿西及以法蓮兩個支族。雖然摩西無將土地分互利未人做家業，毋拘互𪜶城鎮通住，草埔通飼牲生。
5 以色列人照上主命令摩西的話分配彼個地。
迦勒分著希伯崙
6 有一日，猶大人來吉甲見約書亞，基尼洗人耶孚尼的子迦勒對伊講：「上主佇加低斯‧巴尼亞，對上帝重用的人摩西所講關係你及我的代誌，你攏知。
7 上主的僕人摩西對加低斯‧巴尼亞派我來探查此個地的時，我抵仔四十歲；我照我心內所確信的給伊報告。
8 毋拘及我做夥去探查的兄弟的報告互人民驚甲神不附體，只有我忠實信靠上主 — 我的上帝。
9 彼日，摩西咒誓講：『你的腳所踏的地，一定欲互你及你的後代做永遠的家業，因為你忠實信靠上主 — 我的上帝。』
10 對以色列人佇曠野飄流，上主給摩西講諸個話的時到今，已經過四十五年。你看，上主照伊的應允，互我猶活啲，現在我已經八十五歲啦。
11 今仔日我猶勇健，及摩西派我去探查的時仝款；無論是交戰，是出出入入，我的氣力彼時按怎，現在嘛按呢。
12 請你將上主彼日所應允的山區互我。彼日你嘛有聽著，佇遐有亞衲族的人，𪜶的城大閣堅固；若上主及我同在，照伊的應允，我就會給𪜶趕出去。」
13 約書亞就給耶孚尼的子迦勒祝福，用希伯崙互伊做家業。
14 所以，希伯崙是基尼洗人耶孚尼的子迦勒的家業，直到今仔日；因為伊忠實信靠上主 — 以色列的上帝。
15 希伯崙以前叫做基列‧亞巴。亞巴是亞衲族上偉大的人。
對按呢，彼個地太平，無閣有戰爭。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。