上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
31
設立約書亞做繼承人
摩西繼續對以色列人講：
2 「我已經一百二十歲，𣍐當閣領導恁。上主曾對我講：『你𣍐當過約旦河。』
3 上主 — 恁的上帝會佇恁的面前導恁過去，消滅諸個族，互恁佔領𪜶的土地。照上主所講的，約書亞會導恁過去。
4 上主會對待諸個族，親像伊以前對待亞摩利人兩個王，西宏及噩，以及對待𪜶的國家仝款，給𪜶完全消滅。
5 上主會將𪜶交互恁；恁著照我所吩咐恁一切的命令對待𪜶。
6 恁著勇敢壯膽，毋免驚𪜶，毋免因為𪜶恐惶；因為上主 — 恁的上帝會及恁做夥去，𣍐離開恁，𣍐放拺恁。」
7 摩西叫約書亞來，佇以色列眾人的面前對伊講：「你著勇敢壯膽，因為就是你欲導此個人民入去承接上主對𪜶的列祖立誓欲互𪜶的地。
8 上主欲行佇你的頭前，及你同在，𣍐離開你，嘛𣍐放拺你。你毋免驚，嘛毋免懍。」
每七年宣讀律法的冊
9 摩西將律法的冊寫好，就交互扛上主約櫃的利未人做祭司的，及以色列的長老。
10 摩西命令𪜶，講：「逐遍滿七年，佇免除債務彼年的搭寮節，
11 以色列眾人來到上主 — 恁的上帝所揀選敬拜伊的所在，彼時，恁著佇以色列眾人的面前大聲讀此個律法互𪜶聽。
12 著聚集人民，無論查甫、查某、囝仔，以及恁城內的外族人，互𪜶攏聽，互𪜶學習，通敬畏上主 — 恁的上帝，切實遵行此個律法每一句話；
13 嘛互許個猶毋識律法的後代攏會當聽著，通佇過約旦河去承接做產業的地，一世人學習敬畏上主 — 恁的上帝。」
上主對摩西最後的指示
14 上主對摩西講：「你無偌久會離開世間。你叫約書亞來，及你做夥徛𫢶會幕內；我欲交代伊任務。」摩西就及約書亞去徛佇會幕內。
15 上主佇會幕內，佇雲柱中顯現；雲柱停佇會幕門口的頂面。
16 上主閣對摩西講：「你啲欲轉去你的列祖遐。你死以後，諸個人民會佇𪜶入去的所在，服事彼所在的外族神明行邪淫；棄拺我，違背及我立的約。
17 彼時，我會對𪜶發受氣，棄拺𪜶，面越走毋看𪜶；𪜶會受吞滅，抵著真多災禍患難；彼日𪜶就會問，講：『咱抵著災禍患難，是毋是因為咱的上帝無及咱同在？』
18 彼日因為𪜶拜別個神明，作惡多端，所以我一定面越走毋看𪜶。
19 「今，你著寫此首歌，教人民唱，用來教示以色列的後代，做我指責以色列人的見證。
20 我導𪜶進入我對𪜶的列祖立誓欲互𪜶彼個流奶及蜜的地了後，𪜶會食甲肥滋滋，偏向別個神明服事𪜶，煞看輕我，違背我的約。
21 到𪜶抵著災禍患難的時，此首歌會做我指責𪜶的見證；𪜶的後代會繼續唱此首歌，𣍐𣍐記得。雖然我猶未導𪜶進入我立誓欲賜互𪜶的地，毋拘我已經知𪜶的心思念頭。」
22 彼日，摩西就寫此首歌，用來教示以色列人。
23 上主吩咐嫩的子約書亞，講：「你著勇敢壯膽，因為你欲導以色列人入去我立誓欲互𪜶的地；我欲及你同在。」
24 摩西將此個律法的冊寫清楚，
25 就吩咐扛上主約櫃的利未人，講：
26 「此個律法的冊著下佇上主 — 恁的上帝的約櫃邊，通做指責恁的見證。
27 我知恁是背逆、心硬固執的民族；我今仔日猶活啲及恁做夥，恁都會背逆上主，何況我死了後！
28 著聚集恁所有支族的長老及官長來我遮，我欲將諸個話講互𪜶聽，嘛欲叫天叫地來證實恁的毋著。
29 我知，我死了後，恁會徹底敗壞，偏離我所命令恁著行的道路；將來恁會抵著災禍，因為恁會做上主看做歹的事，惹伊受氣。」
摩西的詩歌
30 摩西將此首歌，對頭到尾唸互以色列會眾聽。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。