上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
30
復興及幸福的條件
將來，我所給恁講的祝福及咒詛發生佇恁的身上，恁佇上主 — 恁的上帝給恁流放去的列國中，想起諸個事，
2 彼時，恁及恁的子孫若全心全情歸向上主 — 恁的上帝，照我今仔日的吩咐，遵趁伊一切的話，
3 上主 — 恁的上帝就會憐憫恁，互恁受掠的人倒轉來。伊會回心轉意，將伊給恁四散佇列國的人聚集，導轉來。
4 恁若有人受趕逐，就是佇天邊海角，上主 — 恁的上帝嘛會給恁聚集，對遐導恁倒來。
5 上主 — 恁的上帝會導恁承接恁的列祖佔領的地，好款待恁，互恁的人口加添，比恁的列祖較多。
6 上主 — 恁的上帝會潔淨恁及恁後代的心，互恁一心一意疼上主 — 恁的上帝，互恁佇此個地永遠徛起。
7 上主 — 恁的上帝會將諸個咒詛降落佇恁的對敵，及怨恨恁，窘迫恁的人的身上。
8 恁會閣聽趁上主的話，遵守我今仔日所命令恁伊一切的誡命。
9-10 恁若聽趁上主 — 恁的上帝的話，遵守此個律法所記載的誡命及規例，閣全心全情歸向上主 — 恁的上帝，伊會互恁事事亨通，互恁所生的、牲生生的、土地出產的，充足有賰；因為上主會親像以前意愛恁的列祖按呢，好款待恁，賜福恁。
11 我今仔日所命令恁的誡命，毋是恁做𣍐到的，離恁嘛無遠；
12 毋是佇天頂，恁毋免問，講：「啥人會當為著咱去天頂，將此個教示帶落來，互咱聽見來實行？」
13 嘛毋是佇海的彼旁，恁毋免問，講：「啥人會當為著咱過海，將此個教示帶來，互咱聽見來實行？」
14 此個誡命離恁真近，是佇恁的嘴內，佇恁的心中，互恁會當實行。
15 著會記得，我今仔日將生死禍福給恁講，互恁選擇。
16 我今仔日吩咐恁，著疼上主 — 恁的上帝，行伊的道路，守伊的誡命、規例、命令，上主 — 恁的上帝就會互恁佇欲入去佔領的地久長徛起，人口加添，得著福氣。
17 恁若違背上主閣毋順趁，受引誘去敬拜服事別個神明，
18 我今仔日明明給恁講，恁一定會滅亡，𣍐當佇恁過約旦河欲入去佔領的地久長徛起。
19 我今仔日叫天叫地來對恁作證：我將生及死、災禍及福氣排佇恁的面前；著揀性命，恁及恁的後代就會當繼續生存；
20 著疼上主 — 恁的上帝，聽趁伊的話，忠誠跟隨伊；伊是恁的活命，恁著靠伊才會當繼續生存；按呢恁就通佇上主對恁的列祖亞伯拉罕、以撒、雅各，立誓欲賞賜𪜶的地久長徛起。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。