上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
27
將上主的律法刻佇石頭
摩西及以色列眾長老命令人民，講：恁著遵守我今仔日所吩咐恁一切的誡命。
2 恁過約旦河，去到上主 — 恁的上帝賞賜恁的地彼日，著𫞼幾塊大石，頂面抹石灰，
3 將律法所有的話刻佇大石頂面。恁入去上主 — 恁的上帝賞賜恁的地，就是伊對恁的列祖所應允流奶及蜜的地，
4 過約旦河彼旁岸了後，著照我今仔日的命令，佇以巴路山𫞼許個石頭，頂面抹石灰。
5 佇遐，恁著為上主 — 恁的上帝用石頭起一座祭壇；許個石頭毋通用鐵的工具拍過。
6 著用無拍過的石頭起上主 — 恁的上帝的壇；佇彼頂面獻燒化祭互伊，
7 嘛佇遐獻平安祭；閣佇上主 — 恁的上帝面前歡喜飲食。
8 恁著將此個律法一切的話，清清楚楚刻佇許個石頭。
9 摩西及利未人做祭司的閣吩咐以色列眾人，講：以色列人，著靜靜，著注意聽！今仔日恁成做上主 — 恁的上帝的子民，
10 著聽趁上主 — 恁的上帝的話，遵行我所頒布的上主的誡命及規例。
違背誡命受咒詛
11 彼日，摩西閣吩咐人民講：
12 恁過約旦河了後，利未人祝福人民的時，西緬、利未、猶大、以薩迦、約瑟、便雅憫諸個支族，著徛佇基利心山；
13 宣布咒詛的時，呂便、迦得、亞設、西布倫、但、拿弗他利諸個支族，著徛佇以巴路山。
14 然後，利未人著對以色列眾人大聲宣布：
15 製造上主所厭惡的神像，無論是雕刻的，抑是鑄造的，閣互人暗中祭拜，彼個師傅著受咒詛。眾人攏著應講：「阿們！」
16 對父母不孝的，著受咒詛。眾人攏著講：「阿們！」
17 移徙厝邊的界址的，著受咒詛。眾人攏著講：「阿們！」
18 互失明的人行毋著路的，著受咒詛。眾人攏著講：「阿們！」
19 剝奪外族人及孤兒寡婦的權利的，著受咒詛。眾人攏著講：「阿們！」
20 及老父的某做夥睏的，著受咒詛，因為伊有拍垃墋伊老父的眠床。眾人攏著講：「阿們！」
21 及動物交合的，著受咒詛。眾人攏著講：「阿們！」
22 及仝父的姊妹，抑是仝母的姊妹，做夥睏的，彼個人著受咒詛。眾人攏著講：「阿們！」
23 及丈姆做夥睏的，著受咒詛。眾人攏著講：「阿們！」
24 暗殺厝邊的，著受咒詛。眾人攏著講：「阿們！」
25 接受賄賂害死無辜的人的，著受咒詛。眾人攏著講：「阿們！」
26 無切實遵行諸個律法的話的，著受咒詛。眾人攏著講：「阿們！」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。