上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
17 所有破相，抑是有瑕疵的牛羊，恁毋通獻互上主 — 恁的上帝，因為按呢做是上主所厭惡的。
2 佇上主 — 恁的上帝賞賜恁的城，若有人，無論男女，做上主 — 恁的上帝看做歹的事，違背伊的約，
3 去服事敬拜上主所禁止許個神明，及日頭、月娘、天頂的萬象；
4 若有人給恁講有人做此款代誌，恁嘛已經聽著，就著詳細調查；若果然是事實，真正佇以色列人的中間有此款可惡的事，
5 恁著將彼個人拖去廣場，用石頭給伊抌死。
6 若有兩個抑是三個人出來作證，著互彼個人死；若干焦一個證人，就毋通互伊死。
7 證人著先出手抌伊，然後眾人下手互伊死；按呢就對恁中間除去此款邪惡的事。
8 恁城內若有得判斷的案件，無論是刣人，抑是相告，抑是傷害，恁著去上主 — 恁的上帝揀選的所在，
9 請問利未人做祭司的，及值班的審判官，𪜶會指導恁著按怎判決。
10 𪜶佇上主揀選的所在指導恁的，恁著照按呢做；𪜶教示恁的，著照按呢遵行。
11 𪜶對恁的指導，及對恁講的判決，恁攏著照按呢做，毋通偏左偏右。
12 若有人驕傲毋聽趁服事上主的祭司，抑是審判官，彼個人著互伊死；按呢恁就對以色列人的中間除去此款邪惡的事；
13 眾人聽著就會驚，無人敢閣驕傲毋聽趁。
選立王的條例
14 恁進入上主 — 恁的上帝互恁佔領的地，佇遐徛起，若決定欲親像四圍的列國設立王治理恁，
15 恁一定著設立上主 — 恁的上帝揀選的人作王；著對恁的同胞設立王治理恁；毋通互毋是恁同胞的外國人治理恁。
16 王毋通為著家己加添真多馬，嘛毋通因為愛欲較多馬，互人民倒去埃及；因為上主曾命令恁，講：「恁毋通閣倒去彼條路。」
17 王嘛毋通娶真多嬪妃，才免伊的心受引誘離開上主；伊嘛毋通為著家己累積真多金銀。
18 王開始坐位的時，著照利未人做祭司的所保存的律法書，為家己抄寫一份。
19 此份著下佇王遐，互王一世人讀，通學習敬畏上主 — 伊的上帝，遵行此個律法一切的話及所有的律例；
20 才免伊自高看輕同胞，離開此個誡命，偏左偏右；通互伊及伊的後代久長治理以色列國。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。