上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
11
上主的偉大
恁著疼上主 — 恁的上帝，常常遵守伊所吩咐的，伊的規例、命令、誡命。
2 恁著知，我今仔日是對恁，毋是對恁的子兒講話，𪜶毋知，嘛無看著上主 — 恁的上帝的管教、偉大，伊大氣力的手及伸出來的手骨，
3 以及伊佇埃及對法老及埃及全國所行的神跡，
4 及伊按怎對付埃及的軍兵、戰馬及戰車；就是佇𪜶追趇恁的時，按怎互紅海的水給𪜶淹死，徹底給𪜶消滅；
5 閣恁來到此個所在以前，伊佇曠野按怎款待恁，
6 閣伊按怎對付呂便的後代以利押的子大坍及亞比蘭；佇以色列人的面前互地開嘴吞滅𪜶、𪜶的家屬、𪜶的布棚，以及𪜶所有的奴僕及牲生。
7 只有恁有親目看著上主所做一切偉大的作為。
應允及警告
8 恁著遵守我今仔日所命令恁一切的誡命，恁才有氣力入去佔領恁欲過去承接的地；
9 閣互恁會當久長徛起佇上主立誓欲賞賜恁的列祖及𪜶的後代的地，就是彼個流奶及蜜的地。
10 恁欲入去承接的地，及恁對遐出來的埃及地無仝款；恁佇遐的菜園著撒種籽，踏水車灌溉；
11 毋拘恁欲入去承接的地是有山，有山谷，閣有雨水潤澤的土地；
12 是上主 — 恁的上帝歸年迵天啲照顧，目睭常常啲看顧的地。
13 恁若真正聽趁我今仔日所命令恁的誡命，疼上主 — 恁的上帝，全心全情服事伊，
14 伊就欲照時為著恁的土地落春霖秋雨，互恁通收成五穀、新酒，及新油，
15 嘛互恁的田野發草，通飼牲生；按呢恁就欲得著飽足。
16 著謹慎，才免恁的心受迷惑，離開上主去服事敬拜別個神明，
17 致到上主對恁發大受氣，將天關密無落雨，地無出產，恁就會真緊佇上主所賞賜恁媠的地滅亡。
18 恁著將我的話記佇恁的心內，存佇恁的意念，嘛著縛佇手裡做記號，縛佇頭額提醒；
19 閣著教示恁的子兒，無論佇厝內坐，佇路裡行，倒啲抑是起來，攏著唸互𪜶聽；
20 著寫佇厝的門徛，嘛著寫佇城門；
21 按呢，恁及恁的子孫就通佇上主對恁的列祖立誓賞賜𪜶的土地久長徛起，親像天地存在赫久。
22 恁若切實遵行我所命令恁一切的誡命，疼上主 — 恁的上帝，行伊的道路，忠誠跟隨伊，
23 上主就欲佇恁面前將諸個人民趕走，恁嘛欲征服諸個比恁較強大的國。
24 恁的腳踏過的地攏欲做恁的產業；對南旁的曠野到北旁的黎巴嫩，對東旁的幼發拉底河到西旁的地中海，攏欲成做恁的領土。
25 無一個人會當對抗恁；上主 — 恁的上帝欲照伊對恁的應允，互恁踏過的地的住民攏驚恁，懍恁。
26 看咧，我今仔日將祝福及咒詛排佇恁的面前；
27 恁若遵趁上主 — 恁的上帝的誡命，就是我今仔日所命令恁的，就會得著祝福；
28 恁若毋順趁上主 — 恁的上帝的誡命，偏離我今仔日所命令恁著行的道路，去跟隨恁毋識的神明，就會受咒詛。
29 上主 — 恁的上帝導恁入去佔領許個地的時，恁著佇基利心山宣布祝福，佇以巴路山宣布咒詛。
30 此兩個山是佇約旦河西旁日落的所在，就是佇迦南人徛起的亞拉巴地區，及吉甲相對，倚近摩利橡樹的所在。
31 恁啲欲過約旦河，入去得著上主 — 恁的上帝賞賜互恁做產業的地，佇遐徛起。
32 恁著殷勤遵行我今仔日頒布互恁一切的規例及命令。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。