上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
10
摩西重新接受誡命
( 出 34:1-10 )
彼時，上主給我講：「你著拍兩塊及以前仝款的石版，上山來我遮，閣用木材做一個櫃。
2 你頂回摔破的石版頂面的話，我欲閣寫佇此兩塊石版頂面；你著給𪜶下佇彼個約櫃內面。」
3 我就用金合歡木做一個櫃，閣拍兩塊及以前仝款的石版，然後親手提此兩塊石版上山。
4 上主將伊佇大會的日，佇山頂的火焰中對恁講的十條誡，照以前所寫的寫佇彼兩塊石版；上主就將諸個交代我。
5 我越轉身落山，照上主的命令，將石版下佇我做的約櫃內面；到現在猶佇遐。
6 以色列人對亞干人的水井遐出發，來到摩西拉。亞倫死佇遐，嘛安葬佇遐；伊的子以利亞撒續接伊擔任祭司。
7 𪜶對遐出發，經過谷歌大，到約巴他，佇遐有真多條溪。
8 彼時，上主揀選利未支族扛上主的約櫃，徛佇上主的面前服事伊，奉伊的名祝福，直到今仔日。
9 所以利未支族佇𪜶同胞的中間無分著產業；照上主 — 恁的上帝給𪜶講的，上主就是𪜶的產業。
10 我閣一遍佇山頂四十暝日；此遍上主閣聽我的懇求，無給恁消滅。
11 上主對我講：「你起來，導諸個人民進前，入去佔領我對𪜶的列祖立誓欲互𪜶的地。」
上帝的要求
12 以色列啊，這就是上主 — 恁的上帝對恁的要求：只有敬畏上主 — 恁的上帝，行伊的道路，疼伊，全心全情服事伊，
13 遵守我今仔日所頒布上主的誡命及規例，互恁通得著福氣。
14 看咧，天及至高的天、地及地上的萬物，攏屬上主 — 恁的上帝。
15 上主只有意愛恁的列祖，疼𪜶，佇萬民中揀選𪜶的後代，就是恁，親像今仔日按呢。
16 所以恁著給恁的心行割禮，毋通閣硬心固執。
17 上主 — 恁的上帝是萬神的神，萬主的主，是至大、權能、通驚畏的上帝。伊𣍐看人的身份對待人，嘛𣍐收賄賂；
18 伊為著孤兒寡婦申冤，閣疼出外人，互𪜶食互𪜶穿。
19 恁著疼出外人，因為恁嘛曾佇埃及地做出外人。
20 恁著敬畏上主 — 恁的上帝，服事伊，忠誠跟隨伊，奉伊的名咒誓。
21 恁著稱讚伊，伊是恁的上帝；恁曾親目看著伊為著恁做大閣通驚的事。
22 恁的列祖落去埃及的時只有七十人，現在上主 — 恁的上帝互恁親像天頂的星赫呢多。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。