上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
1
摩西的回憶
下面是摩西佇約旦河東旁的曠野，蘇弗對面的亞拉巴，就是佇巴蘭及陀弗、拉班、哈洗錄、底撒哈的中間，對以色列人民講的話。
2 對何烈山經過西珥山到加低斯‧巴尼亞，需要十一日的路程。
3 佇出埃及了後第四十年，十一月初一，摩西將上主交代伊對以色列人所有的命令，攏給𪜶講。
4 彼時，摩西已經刣贏住佇希實本的亞摩利王西宏，及住佇以得來、亞斯他錄的巴珊王噩。
5 摩西佇約旦河東旁的摩押地，開始講解上主的律法，講：
6 上主 — 咱的上帝佇何烈山給咱吩咐講：「恁佇此個山已經住有夠久啊；
7 著起身斡去亞摩利的山地，以及彼附近的亞拉巴、山地、山埔、尼革夫、地中海沿海一帶，迦南人的地區，及黎巴嫩，直到大河，就是幼發拉底河。
8 今，我將此個地賜互恁，恁著入去承接；此個地是上主對恁的祖先，亞伯拉罕、以撒、雅各立誓應允，欲賞賜𪜶及𪜶的子子孫孫的土地。」
摩西選立審判官
9 ( 出 18:13-27 )
彼時，我有給恁講：「管理恁的責任，我家己一個擔當𣍐起。
10 上主 — 恁的上帝互恁人口加添，到今仔日親像天頂的星赫多。
11 願上主 — 恁列祖的上帝照伊對恁的應允賜福恁，互恁的人口加添千倍。
12 管理恁的重擔及責任，以及處理恁的訴訟，我家己一個哪擔當會起？
13 恁著對逐支族揀有智慧、有才能、有經驗的人，我就設立𪜶做恁的領袖。」
14 恁應我講：「你講欲做的代誌真好。」
15 我就將恁逐支族選出來有智慧、有經驗的人，設立𪜶做管理恁的領袖，有的管一千人，有的管一百人，有的管五十人，有的管十人，閣設立其他的官員。
16 當時我吩咐恁的審判官，講：「恁裁決相告的事，無論是同胞中間的案件，抑是及住佇恁中間的外族人的案件，著照公道判決。
17 恁裁決的時，毋通偏袒，相告的人無論是尊貴抑是卑微攏著公平對待。毋通驚任何人，因為恁是替上帝審判。困難解決的案件，著送來我遮，我會裁決。」
18 彼時，我嘛將恁應該做的事攏給恁吩咐。
派人探查迦南地
19 ( 民 13:1-33 )
咱照上主 — 咱的上帝的命令，對何烈山出發，經過恁所看著彼個闊閣通驚的曠野，行向亞摩利人的山區。咱到加低斯‧巴尼亞的時，
20 我給恁講：「恁已經到上主 — 咱的上帝賞賜互咱的亞摩利人的山地。
21 今，上主已經將彼個地賜互恁，恁著照上主 — 恁列祖的上帝對恁的應允，上去承接彼個地；毋通驚，毋通懍。」
22 彼時恁攏來我遮，給我講：「咱著派人先去探查彼個地，給咱報告，看咱著對叨一條路，叨一個城入去。」
23 我看按呢做真好，就對恁中間揀十二個人，每一支族一個。
24 𪜶就出發上山區，去以實各山谷探查。
25 𪜶帶彼所在的果子轉來咱遮，給咱報告，講：「上主 — 咱的上帝賞賜互咱的，是真媠的地。」
26 毋拘恁違背上主 — 恁的上帝的命令，毋肯入去彼個地，
27 閣佇恁的布棚內埋怨講：「因為上主怨恨咱，所以導咱出埃及地，欲將咱交互亞摩利人，給咱剿滅。
28 今咱是欲去什麼款所在？咱的兄弟互咱失志；𪜶給咱講：『遐的人民比咱較勇較躼，城闊大閣堅固，高到抵天；阮閣佇遐看著亞衲族的人。』」
29 我就給恁講：「毋免驚，嘛毋免懍𪜶。
30 行佇恁頭前的上主 — 恁的上帝會為恁交戰，親像伊佇埃及為著恁所做的仝款。
31 恁佇曠野啲行的時，有看見上主 — 恁的上帝按怎給恁養飼照顧，親像人啲養育子兒，直到恁來到此個所在。」
32 雖然按呢，恁毋信上主 — 恁的上帝；
33 伊一路行佇恁的頭前，給恁尋安營的所在；暝時用火，日時用雲，指示恁著行的路。
上主刑罰以色列人
34 ( 民 14:20-45 )
上主聽著恁埋怨的聲就受氣，立誓講：
35 「此個歹世代的人絕對無一個會當看著我所立誓應允賞賜恁列祖此塊媠的地；
36 只有耶孚尼的子迦勒會當看著；閣我欲將伊踏過的地賜互伊及伊的子孫，因為伊專心信靠上主。」
37 上主嘛因為恁的緣故對我受氣，講：「你嘛𣍐當入去彼塊土地；
38 跟隨你的嫩的子約書亞會入去；你著給伊鼓勵，因為伊欲導以色列人入去承接彼個地。」
39 上主閣講：「恁的囝仔，就是恁啲想會互人掠去，今仔日猶𣍐曉分別好歹的子兒，會入去遐；我欲將彼個地賜互𪜶做產業。
40 恁咧，恁著越倒轉，向紅海的方向去曠野。」
41 恁回答我，講：「阮有得罪上主；今阮欲照上主 — 阮的上帝的命令上去交戰。」恁逐個人就大主大意，帶軍器上去山區。
42 上主給我講：「你著叫𪜶毋通出去，毋通去交戰，因為我無及恁同在，才免恁刣輸對敵。」
43 我就給恁講，毋拘恁毋聽，背逆上主的命令，大主大意𬦰上山區。
44 住佇遐的亞摩利人就出來攻擊恁，親像蜂給恁追趕，佇以東山區的何珥瑪給恁拍敗。
45 恁就閣佇上主的面前啼哭，毋拘上主毋聽恁的聲，無欲插恁。
46 恁就佇加低斯住一段真久的時間。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。