上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
35
分互利未人的城
上主佇約旦河邊、耶利哥對面的摩押平原對摩西講：
2 「你著命令以色列人，對𪜶得著的產業分幾個城鎮以及周圍的草埔互利未人。
3 許個城鎮欲互𪜶徛起，草埔欲互𪜶飼牛、羊、牲生，及𪜶所有的動物。
4 恁互利未人的草埔，是對城牆量起，向外量四百五十公尺；
5 就是用城做中心，東西南北逐旁各有九百公尺的四角形區域；城鎮周圍的地欲互利未人做飼牲生的所在。
6 恁互利未人的城鎮中間，著設立六個做避難城，互刣死人的會當逃難去遐。此六個城鎮以外，恁著閣互𪜶四十二個城鎮。
7 恁著互利未人四十八個城鎮，包括𪜶周圍的草埔攏著互𪜶。
8 以色列人對產業的中間分互利未人的城鎮，土地大的支族就出較多，土地小的支族就出較少；逐支族照家己得著產業的多少，將城鎮分互利未人。」
避難城
9 ( 申 19:1-13 書 20:1-9 )
上主對摩西講：
10 「你著按呢命令以色列人：恁過約旦河，進入迦南地，
11 著指定幾個城做避難城，互誤殺人的通走去遐。
12 諸個城通做恁逃避報冤仇的人的城，互誤殺人的佇會眾面前受審判以前，𣍐互人刣死。
13 恁著指定六座城做避難城；
14 約旦河東旁三座、迦南地三座。
15 此六座城欲互以色列人，及暫時抑是長期住佇𪜶中間的外族人，做避難城，互誤殺人的通逃走去遐。
16 「若有人用鐵器給人拍死，伊就是故意刣人；故意刣人的，一定著給伊處死。
17 若有人用會互人死的石頭拍死人，伊就是故意犯罪；故意拍死人的，一定著給伊處死。
18 若提會互人死的柴器給人拍死，伊就是故意拍死人；故意拍死人的，一定著給伊處死。
19 互人拍死彼個人的至親著親身給兇手刣死；一下抵著伊，就通互伊死。
20 「若有人因為怨恨人給人捙倒，抑是故意用物件給人抌，互彼個人死；
21 抑是因為拾恨用手給人拍死，伊就是故意拍死人；故意拍死人的一定著給伊處死。互人拍死彼個人的至親一下抵著兇手，就通互伊死。
22 「毋拘，若有人無意中給人捙倒，抑是用物件抌著人，
23 抑是佇無看見的時，抑是及對方無冤仇，嘛無意思欲害死對方，毋拘煞用會互人死的石頭給人抌死，
24 會眾著照規例，佇拍死人的及報冤仇的中間審判。
25 會眾著救彼個誤殺人的脫離死者的至親，給伊送倒去伊走去匿的避難城，佇受抹油設立的大祭司死以前互伊住佇遐。
26 毋拘誤殺人的一旦離開避難城，
27 互人拍死彼個人的至親若佇城外抵著伊，給伊拍死，無算有罪。
28 因為彼個誤殺人的著佇大祭司死以前，攏住佇避難城。大祭司死以後，伊才通轉去伊家己家業的地。
29 無論恁住佇什麼所在，這欲做恁世世代代永遠的規例。
30 「若有人受控告刣死人，著有兩個以上的證人作證，才通給伊處死；若只有一個證人，毋通給伊宣判死罪。
31 判死罪的兇手𣍐用得用贖金贖回性命；一定著給伊處死。
32 若有人走去避難城，𣍐用得收贖金互伊佇大祭司死以前倒去伊的本地徛起。
33 恁毋通拍垃墋恁徛起的地；因為流人的血就是拍垃墋土地。若有人刣死人，著用伊的命賠命流伊的血，彼個地才會當得著潔淨。
34 恁毋通拍垃墋恁徛起的土地，因為我上主嘛𫢶佇此個地，住佇以色列人的中間。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。