上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
32
約旦河東旁的支族
( 申 3:12-22 )
呂便及迦得兩支族的牲生非常多。𪜶看著雅謝及基列兩個地區適合飼𪜶的牲生，
2 就去見摩西、祭司以利亞撒，及會眾的首領，講：
3-4 「上主互以色列人攻佔的亞他錄、底本、雅謝、寧拉、希實本、以利亞利、示班、尼波，及比穩，是真適合飼牲生的所在。你的僕人抵抵有真多牲生。」
5 𪜶閣講：「阮若得著你的恩惠，請你將此個地區互你的僕人做產業，互阮毋免過約旦河。」
6 摩西應迦得及呂便的子孫講：「恁豈欲放恁的兄弟過去交戰，家己留𫢶遮？
7 恁是按怎欲互以色列人灰心失志，毋敢過約旦河，入去上主賜互𪜶的地？
8 佇加低斯‧巴尼亞的時，我派恁老父彼代的人去探查彼個地，𪜶嘛是按呢。
9 𪜶去到以實各山谷，探查此個地了後轉來，就互以色列人灰心失志，害𪜶無欲入去上主賜互𪜶的地。
10 彼時，上主發大受氣，立誓講：
11 『所有對埃及出來，二十歲以上的人，一定𣍐當看著我對亞伯拉罕、以撒、雅各立誓欲賜互𪜶的地；因為𪜶無一心一意跟隨我；
12 只有基尼洗宗族耶孚尼的子迦勒及嫩的子約書亞會當入去，因為𪜶一心一意跟隨我。』
13 上主對以色列人發受氣，互𪜶佇曠野流浪四十年，聽候到違背上主彼代攏死了。
14 今，恁此陣罪人竟然欲續接恁老父彼代，加添上主對以色列人的受氣。
15 恁若越走無欲順趁上主，伊就會給以色列人放佇曠野，按呢，恁會互此個民族攏滅亡。」
16 此兩個支族的人行倚摩西，對伊講：「阮佇遮是干焦欲為牲生搭羊椆，為阮的某子起城，
17 阮會攑軍器，做以色列人的先鋒，導𪜶去到分互𪜶的地。不過，阮的某子著住佇堅固的城，才免受此所在的人侵犯。
18 佇所有的以色列人攏得著𪜶的產業以前，阮𣍐轉來阮的厝。
19 閣阮及𪜶過約旦河，𣍐去分產業，因為阮的產業就是佇約旦河東旁。」
20 摩西就對𪜶講：「恁若欲按呢做，欲佇上主面前帶軍器去交戰，
21 恁所有帶軍器的人著佇上主面前過約旦河，直到上主將伊的對敵趕出去，
22 到伊征服彼個地，恁才通倒來。按呢，恁對上主、對以色列人的責任就算完成，此塊地佇上主面前才互恁做產業。
23 恁若無按呢做，就是得罪上主；恁著知，恁會因為恁的罪受刑罰。
24 今，恁通為著恁的某子起城，為著羊群搭羊椆，毋拘恁著照恁所講的去做。」
25 迦得及呂便兩支族的人對摩西講：「你的僕人欲照阮的主的命令去做。
26 阮的某、子、羊群、牲生，攏欲留佇基列諸個城。
27 你的僕人，所有會帶軍器去相刣的，攏欲照阮的主所講的話，佇上主的面前過河去交戰。」
28 摩西就為著𪜶吩咐祭司以利亞撒、嫩的子約書亞，以及以色列逐支族的族長，
29 講：「迦得及呂便兩支族所有帶軍器的，若及恁做夥佇上主的面前過約旦河去交戰，恁征服彼個地了後，著將基列地區互𪜶做產業。
30 毋拘，𪜶若無欲帶軍器及恁做夥過河，𪜶干焦會當佇迦南地及大家做夥分產業。」
31 迦得及呂便兩支族的人應講：「上主按怎命令阮諸個僕人，阮就照按呢做。
32 阮欲帶軍器佇上主的面前過河入去迦南地，毋拘約旦河此旁的地著互阮做產業。」
33 摩西將亞摩利王西宏及巴珊王噩的國，就是𪜶的國土及境內的城，分互迦得及呂便兩個支族，以及約瑟的後代瑪拿西半支族。
34 迦得的後代重建底本、亞他錄、亞羅珥、
35 亞他錄‧朔反、雅謝、約比哈、
36 伯‧寧拉、伯‧哈蘭諸個堅固的城，閣起羊椆。
37 呂便的後代重建希實本、以利亞利、基列亭、
38 尼波、巴力‧免 (此兩個城的名有改過)，及西比瑪。𪜶給諸個重建的城號新的名。
39 瑪拿西的子瑪吉的後代去基列，佔領彼個地區，將原來住佇遐的亞摩利人趕出去。
40 摩西就將基列互瑪拿西的後代瑪吉宗族；𪜶就佇遐徛起。
41 瑪拿西的後代睚珥去攻取基列地區的庄社，給許個庄社號做哈倭特‧睚珥。
42 挪巴攻佔基納及附近的庄社；用家己的名給彼個所在號做挪巴。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。