上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
28
逐日著獻的祭
( 出 29:38-46 )
上主吩咐摩西
2 命令以色列人，講：「恁著照時慎重奉獻祭物互我，用火燒，做我所意愛芳芳的食物。」
3 你閣著給𪜶講：「恁逐日著獻兩隻無瑕疵一歲的羊仔做燒化祭，用火燒做芳芳的祭物獻互上主；
4 早起時及黃昏的時各獻一隻。
5 閣著將一公斤的幼麵粉及掙出來一公升的橄欖油抄做夥，獻做素祭。
6 這是佇西奈山制定，逐日著用火燒獻互上主芳芳的燒化祭。
7 獻第一隻羊仔的時，嘛著佇聖所用一公升的厚酒做奠酒祭獻互上主。
8 黃昏獻另外彼隻羊仔的時，著及早起時仝款獻素祭及奠酒祭，攏用火燒做芳芳的祭物獻互上主。」
安歇日獻的祭
9 「安歇日著獻兩隻一歲無瑕疵的羊仔，閣獻兩公斤抄油的幼麵粉做素祭，以及奠酒祭。
10 這是逐日著獻的燒化祭及奠酒祭以外，每一個安歇日著閣獻的燒化祭。」
初一獻的祭
11 「逐個月初一，恁著獻燒化祭互上主，就是獻兩隻牛仔、一隻綿羊、七隻一歲的綿羊仔；諸個攏著無瑕疵的。
12 獻牛的時，嘛著獻三公斤抄油的幼麵粉做素祭；獻綿羊的時，嘛著獻兩公斤抄油的幼麵粉做素祭。
13 獻逐隻綿羊仔的時，嘛著獻一公斤抄油的幼麵粉做素祭。這是燒化祭，用火燒獻互上主芳芳的祭物。
14 獻燒化祭的時，嘛著獻奠酒祭：一隻牛配合兩公升的酒，一隻羊配合一公升半的酒，一隻綿羊仔配合一公升的酒。諸個是一年中間逐個月初一著獻的燒化祭。
15 除了逐日著獻的燒化祭及奠酒祭以外，著用一隻山羊做贖罪祭獻互上主。」
𨃟過節著獻的祭
16 ( 利 23:5-14 )
「正月十四是上主的𨃟過節。
17 此個月的十五起是節期，著食無酵餅七日久。
18 頭一日著舉行聖會，任何日常的工作攏毋通做。
19 你著獻無瑕疵的兩隻牛仔、一隻綿羊、七隻一歲的綿羊仔做燒化祭，用火燒獻互上主。
20 獻逐隻牛的時，著配合三公斤抄油的幼麵粉做素祭；獻彼隻綿羊的時，著配合兩公斤抄油的幼麵粉。
21 獻七隻綿羊仔的時，逐隻著配合一公斤抄油的幼麵粉。
22 閣著獻一隻山羊做贖罪祭，給恁贖罪。
23 恁逐早起獻燒化祭以外，著閣獻以上諸個祭。
24 仝款，逐日獻的燒化祭及奠酒祭以外，連連七日，著照規例用火燒，將芳芳的食物獻互上主。
25 第七日著舉行聖會，任何日常的工作攏毋通做。」
七七收割節著獻的祭
26 ( 出 34:22 利 23:15-22 申 16:9-12 )
「七七收割節，就是恁將初熟的五穀做素祭獻互上主彼日，著舉行聖會；任何日常的工作攏毋通做。
27 恁著獻芳芳的燒化祭互上主，就是獻兩隻牛仔、一隻綿羊、七隻一歲的綿羊仔。
28 恁獻逐隻牛的時，著配合三公斤抄油的幼麵粉做素祭；獻彼隻綿羊的時，著配合兩公斤抄油的幼麵粉；
29 獻彼七隻綿羊仔的時，逐隻著配合一公斤抄油的幼麵粉。
30 閣著獻一隻山羊，給恁贖罪。
31 逐日著獻的燒化祭及素祭以外，恁著獻諸個無瑕疵的祭物及奠酒祭。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。