上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
20
加低斯事件
( 出 17:1-7 )
正月，以色列人全體會眾來到尋的曠野，佇加低斯紮營。美莉安死佇遐，就安葬佇遐。
2 會眾無水通飲，就聚集攻擊摩西及亞倫。
3 𪜶去給摩西吵，講：「苦𣍐得阮的同胞死佇上主面前的時，阮嘛做夥死死咧。
4 恁是按怎給上主的會眾導來此個曠野，是欲互阮及阮的牲生死佇遮是無？
5 恁是按怎導阮出埃及，來到此個歹所在？阮佇遮無所在通撒種，通種無花果、葡萄、石榴，閣無水通飲。」
6 摩西及亞倫離開會眾，去會幕門口，仆佇土腳；上主的榮光對𪜶顯現。
7 上主對摩西講：
8 「你去給約櫃頭前彼支柺仔攑來，及你的兄哥亞倫召集會眾，佇𪜶的目睭前命令石磐出水，水就會對石磐流出來，互會眾及𪜶的牲生飲。」
9 摩西就照上主的命令，給柺仔攑來。
10 摩西及亞倫招會眾去石磐遐；摩西對𪜶講：「恁諸個背逆的人聽咧，阮豈著互石磐出水互恁飲？」
11 摩西攑手裡的柺仔，給石磐摃兩下，就有真多水流出來；會眾及𪜶的牲生攏飲。
12 上主對摩西及亞倫講：「因為恁毋信我，無佇以色列人的目睭前尊我做聖，所以恁𣍐當導諸個會眾入去我欲賜互𪜶的地。」
13 諸個水就叫做米利巴水泉；因為以色列人給上主吵；上主就對𪜶顯明家己是聖。
以東王毋准以色列人過境
14 摩西對加低斯差使者去見以東王，講：「你的親族以色列人按呢講：你知阮有抵著真多艱苦。
15 阮的祖先落去埃及，住佇遐幾若年；埃及人壓迫阮及阮的祖先。
16 阮哀求上主，伊聽阮的聲，就派使者導阮離開埃及。現在阮佇你邊界的城加低斯。
17 今，請允准阮經過你的地。阮𣍐對恁的田園及葡萄園過，嘛𣍐飲井水；只有行大路，𣍐偏左偏右，一直到過你的邊界。」
18 以東王講：「恁𣍐用得對我遮過；若一定欲過，我欲派兵攻擊恁。」
19 以色列人給伊講：「阮會對大路過去。阮及牲生若飲你的水，阮會照價數互你。拜託，請允准互阮過。」
20 以東王講：「不准恁過。」伊就導一大陣武裝部隊出來攻擊𪜶。
21 按呢，以東王毋准以色列人對𪜶的土地經過；以色列人就斡對別個方向去。
亞倫死
22 以色列全體會眾對加低斯出發去到何珥山。
23 佇以東邊界的何珥山，上主吩咐摩西及亞倫，講：
24 「亞倫連鞭會死；伊𣍐當入去我欲賜互以色列人的地，因為佇米利巴水泉的事件恁違背我的命令。
25 你著導亞倫及伊的子以利亞撒上何珥山，
26 給亞倫的衫褪起來互伊的子以利亞撒穿；亞倫會死佇遐。」
27 摩西就照上主的命令做。𪜶三個人佇會眾的目睭前上何珥山。
28 摩西將亞倫的衫褪起來，穿佇伊的子以利亞撒身上，亞倫就死佇山頂。摩西及以利亞撒落山。
29 以色列全家知亞倫已經死，就為亞倫啼哭三十日。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。