上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
18
應允亞伯拉罕生子
上主佇幔利的橡樹遐對亞伯拉罕顯現；彼時日當熱，亞伯拉罕坐佇布棚入口。
2 亞伯拉罕攑頭注意看，看著三個人佇對面啲徛。伊一下看著，就對布棚口走去迎接𪜶，
3 仆佇土腳對𪜶講：「我的主，若無棄嫌，請𫢶遮小歇一下。
4 請𫢶樹仔腳歇睏，等我提一寡水互恁洗腳，
5 提淡薄餅互恁加添元氣，後來才閣繼續行。恁既然來到僕人遮，請接受我的款待。」
𪜶講：「照你講的去做。」
6 亞伯拉罕趕緊入去布棚，給莎拉講：「你趕緊撋三斗幼麵粉，做餅。」
7 亞伯拉罕閣走去牛群遐，牽一隻茈閣好的牛仔子，交互少年僕人趕緊去準備。
8 亞伯拉罕閣提起司、牛奶，及料理好的牛仔子來，排佇此三個人的面前；家己佇樹腳給𪜶侍候，𪜶就食。
9 𪜶問伊：「你的某莎拉佇叨位？」
伊講：「佇布棚內。」
10 𪜶中間的一個講：「明年此個時陣我一定會閣來你遮；你的某莎拉會生一個後生。」
莎拉佇彼個人後面的布棚口有聽著諸個話。
11 亞伯拉罕及莎拉已經老；莎拉已經無月經。
12 莎拉心內笑講：「我已經衰荏，我的主人嘛老啦，豈猶有此款歡喜的代誌？」
13 上主對亞伯拉罕講：「莎拉是按怎偷偷仔笑講：『我已經老，豈有影會生子？』
14 上主豈有𣍐當做的代誌？到明年此個時，我會閣來你遮，莎拉會生一個子。」
15 莎拉驚，毋敢承認，講：「我無笑。」
彼個人講：「有，你真正有笑。」
亞伯拉罕為所多瑪祈求
16 彼三個人對遐出發去所多瑪；亞伯拉罕及𪜶做夥行，欲送𪜶一站。
17 上主講：「我欲做的代誌，豈無欲互亞伯拉罕知？
18 亞伯拉罕一定會成做大閣強的國家；地上萬國欲因為伊得著福氣。
19 我揀選伊，是欲互伊命令伊的子孫及將來的家屬，著遵守上主的教示，秉公行義，通互上主對亞伯拉罕的應允攏實現。」
20 上主講：「所多瑪及蛾摩拉罪大惡極，控告𪜶的聲真大。
21 今我欲落去，看𪜶的所做是毋是親像我所聽著的按呢；若毋是按呢，我嘛會知。」
22 中間兩個人對遐越轉身去所多瑪；亞伯拉罕猶徛佇上主的面前。
23 亞伯拉罕行進前講：「義人及歹人，你攏欲做夥剿滅是無？
24 城內若有五十個義人，你猶原欲剿滅此個城是無？無欲為著城內此五十個義人赦免𪜶是無？
25 你絕對𣍐做此款代誌，將義人及歹人做一下刣死，煞互義人及歹人攏像款。你絕對𣍐。審判全地的主豈毋是著照公義審判？」
26 上主講：「我若佇所多瑪城內尋會著五十個義人，我就為著𪜶的緣故寬赦此個城。」
27 亞伯拉罕閣講：「我不過是火灰土粉，毋拘請容允我對我的主講話。
28 此五十個義人若減五個，你豈欲因為差五個，猶原欲剿滅全城？」
上主講：「我若佇遐尋有四十五個，嘛𣍐給伊剿滅。」
29 亞伯拉罕閣對伊講：「佇遐若尋有四十個咧？」
伊講：「為著此四十個的緣故，我嘛𣍐做此個代誌。」
30 亞伯拉罕閣講：「求主毋通受氣。我欲閣講，佇遐若尋有三十個咧？」
伊講：「佇遐若尋有三十個，我嘛𣍐做此個代誌。」
31 亞伯拉罕講：「請容允我對我的主講，佇遐若尋有二十個咧？」
伊講：「為著此二十個的緣故，我嘛無欲給𪜶剿滅。」
32 亞伯拉罕閣講：「我的主啊，請毋通受氣，我閣講最後一遍，佇遐若尋有十個咧？」
伊講：「為著此十個的緣故，我嘛無欲給𪜶剿滅。」
33 上主及亞伯拉罕講煞，就離開。亞伯拉罕嘛倒去伊的所在。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。