上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
16
可拉、大坍、亞比蘭反叛
利未的曾孫，哥轄的孫，以斯哈的子可拉，及呂便的後代以利押的子大坍、亞比蘭，及比勒的子安，
2 𪜶起來反抗摩西，導以色列人中間兩百五十個有名望，受會眾選出的領袖，做夥去尋摩西。
3 𪜶聯合攻擊摩西及亞倫，講：「恁傷過份啦！全體會眾逐個人攏是聖，上主嘛佇𪜶中間；恁是按怎自高，看家己比上主的會眾較高？」
4 摩西聽著此個話就仆佇土腳，
5 對可拉及𪜶彼陣人講：「明仔早起，上主欲指示什麼人是屬伊的，什麼人是聖，就會叫彼個人就近伊；上主欲互伊揀選的人親近伊。
6 恁著按呢做：可拉及恁此陣人，著提香爐來；
7 明仔載恁著佇上主面前，佇香爐內面貯火，頂面下香。上主揀著的人，伊才是聖。恁諸個利未的子孫才是傷過份啦！」
8 摩西閣對可拉講：「利未的子孫，注意聽！
9 以色列的上帝給恁對以色列的會眾分別出來，互恁親近伊，辦理上主會幕的事，閣徛佇會眾面前服事，這豈是小可代誌？
10 上帝閣互你，及你的親族利未的子孫做夥親近伊，恁猶欲要求祭司的職份是無？
11 你及恁此陣人聯合，是啲攻擊上主。亞倫是啥人，恁竟然對伊發怨言？」
12 摩西差人去叫以利押的子大坍及亞比蘭；𪜶講：「阮毋去！
13 你給阮對流奶及蜜的埃及地導出來，害阮死佇曠野，閣欲家己作王管轄阮是無？
14 你毋若無導阮去到你所講流奶及蜜的地，無互阮有田園及葡萄園做家業，閣欲挖諸個人的目睭是無？阮無欲去你遐。」
15 摩西就非常受氣，對上主講：「求你毋通接納𪜶的祭物。我毋曾牽過𪜶一隻驢，嘛毋曾害過𪜶一個人。」
16 摩西對可拉講：「你及恁此陣人，及亞倫，明仔載攏著來徛佇上主的面前。
17 恁兩百五十人逐個著帶香爐，內面貯香，來到上主的面前；你及亞倫著家己帶香爐來。」
18 𪜶逐個人就提香爐，內面貯火，頂面下香；𪜶及摩西、亞倫徛佇會幕門口。
19 可拉招集全體會眾來會幕門口，攻擊摩西、亞倫。彼時，上主的榮光向會眾顯現。
20 上主吩咐摩西及亞倫講：
21 「恁著離諸個會眾較遠咧，我欲佇一目𥍉久的中間給𪜶消滅。」
22 摩西及亞倫就仆佇土腳，講：「上帝啊，賞賜性命互世間人的上帝，一個人犯罪，你就對全會眾發大受氣是無？」
23-24 上主吩咐摩西去給會眾講：「恁著離開可拉、大坍、亞比蘭布棚的四周圍。」
25 摩西去大坍、亞比蘭遐，以色列的長老嘛隨伊去。
26 伊吩咐會眾講：「恁著離開諸個歹人的布棚。𪜶的物件攏毋通摸，才免恁及𪜶做夥消滅。」
27 會眾就離開可拉、大坍、亞比蘭布棚的四周圍。
大坍、亞比蘭及𪜶的某、子兒、𪜶的細子，攏出來徛佇𪜶家己的布棚門口。
28 摩西講：「是上主差我做諸個代誌，所以恁著知，毋是我照家己的意思啲做。
29 諸個人若及一般人仝款自然死，抵著及一般人仝款的遭遇，就是上主無差我。
30 上主若做一項新的事，互地開嘴，將𪜶及彼陣人攏吞落去，互𪜶活活摔落陰間，恁就知諸個人藐視上主。」
31 摩西話抵仔講煞，大坍及亞比蘭下面的地就裂開。
32 地裂開，將𪜶及𪜶的家眷，以及所有屬可拉的人、財物攏吞落去。
33 許個人及所有屬𪜶的攏活活落陰間；地佇𪜶的頂面閣合倚，𪜶就對會眾中間消滅。
34 佇𪜶四周圍的以色列人聽著𪜶喉叫，就攏逃走，講：「咱嘛會互地吞落去！」
35 閣有火對上主遐發出，吞滅彼兩百五十個獻香的人。
香爐
36 上主命令摩西
37 吩咐祭司亞倫的子以利亞撒，給許個香爐對火中拾起來，閣給許個啲𤏸的火炭提去較遠的所在撒互散；許個香爐已經是聖。
38 許個香爐已經獻互上主，所以是聖的。你著將許個犯罪害家己性命的人的香爐，錘做歸片，貼佇祭壇，通做以色列人的鑑戒。
39 祭司以利亞撒就給許個人所獻銅的香爐提來，錘做歸片，給祭壇包啲，
40 互以色列人做鑑戒；才免毋是屬亞倫後代的外人佇上主的面前燒香，親像可拉及𪜶彼陣人受消滅；這是照上主通過摩西對以利亞撒的命令。
亞倫救人民
41 隔日，以色列人全體會眾攏埋怨摩西及亞倫，講：「恁害死上主的子民。」
42 會眾聚集攻擊摩西及亞倫的時，忽然看見會幕有雲蓋啲，上主的榮光顯現。
43 摩西及亞倫就來會幕頭前，
44 上主吩咐摩西，講：
45 「恁著離開此個會眾，互我通佇一目𥍉久的中間給𪜶消滅。」𪜶兩個人就仆佇土腳。
46 摩西對亞倫講：「去提你的香爐，將祭壇頂的火下佇彼內面，頂面下香，較緊帶去會眾遐，給𪜶贖罪；因為上主已經發大受氣，瘟疫湠開啦。」
47 亞倫照摩西的吩咐，提香爐走入去會眾中間。唉啊！瘟疫已經佇人民的中間啲湠啦。亞倫就將香下佇火的頂面，給人民贖罪。
48 伊徛佇活人及死人的中間，瘟疫就停止。
49 除了因為可拉的事件死的以外，抵著瘟疫死的共一萬四千七百人。
50 瘟疫停止了後，亞倫就倒來會幕門口摩西遐。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。