上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
15
獻祭的條例
上主命令摩西
2 著吩咐以色列人：恁去到我賞賜恁徛起的地，
3 若欲對牛群羊群中間取來做芳芳的祭物，用火燒獻互上主，無論是燒化祭抑是別款的祭，是謝願抑是甘心獻的祭，抑是節期的祭，
4-5 逐隻羊仔著配用一公斤幼麵粉抄一公升油做的素祭，以及一公升的酒做奠酒祭。無論是燒化祭抑是別款的祭，奉獻的人攏著照按呢獻祭物互上主。
6 獻綿羊，著配用兩公斤的幼麵粉抄一公升半的油做的素祭；
7 閣用一公升半的酒做奠酒祭，用火燒做芳芳的祭獻互上主。
8 你若獻牛仔做燒化祭抑是別款的祭，來謝願抑是做平安祭獻互上主，
9 著用三公斤的幼麵粉抄兩公升的油做素祭，及牛仔做夥獻；
10 閣用兩公升的酒做奠酒祭，用火燒做芳芳的祭獻互上主。
11 獻每一隻牛、綿羊、綿羊仔、抑是山羊仔，攏著照按呢奉獻。
12 無論你奉獻幾隻，每一隻著照按呢辦理。
13 逐個在地出世的以色列人，若欲獻用火燒的芳芳的祭互上主，攏著照按呢辦理。
14 若有外族人來住佇恁中間，不管𪜶是暫時，抑是世世代代住佇恁中間，𪜶若欲獻用火燒的芳芳的祭互上主，恁按怎獻，𪜶嘛著照按呢做。
15 關係會眾，無論是恁抑是住佇恁中間的外族人，攏著守仝款的規例，這欲做恁世世代代永遠的規例；佇上主的面前，恁按怎辦理，𪜶嘛著照按呢做。
16 恁及住佇恁中間的外族人，著遵守像款的律法，像款的規例。
17 上主閣命令摩西
18 著吩咐以色列人：恁去到上主導恁入去彼個地，
19 食彼所在的米糧，著獻禮物互上主。
20 恁著將第一塊烘出來的餅，攑高做禮物獻互上主，親像佇五穀場將初熟的五穀攑高來獻仝款。
21 恁世世代代著照按呢做，獻禮物互上主。
22 恁若無意中犯著上主命令摩西的任何誡命，
23 就是上主通過摩西命令恁的，對上主命令恁彼日，到以後逐世代，
24 若有人犯著，毋拘無人知，會眾著獻一隻牛仔做燒化祭，閣照獻祭的規例配素祭及奠酒祭，做夥做芳芳的祭獻互上主；閣著獻一隻山羊做贖罪祭。
25 祭司著為以色列全體會眾贖罪，𪜶就得著赦免；𪜶是無意中犯錯，嘛有為著𪜶的錯誤，帶用火燒的祭物及贖罪祭到上主的面前獻互伊。
26 以色列會眾及住佇𪜶中間的外族人，就欲得著赦免，因為這是人民無意中犯著的罪。
27 若有人無意中犯罪，伊著獻一隻一歲的山羊母做贖罪祭。
28 祭司著為無意中犯罪彼個人佇上主的面前贖罪，伊就欲得著赦免。
29 在地的以色列人及住佇𪜶中間的外族人，若無意中犯罪，著照像款的規例辦理。
30 若有人故意犯罪褻瀆上主，無論是以色列人抑是住佇𪜶中間的外族人，著將伊對人民的中間革出。
31 彼個人藐視上主的話，違背伊的命令，伊著受革出，為家己的罪負責任。
違犯安歇日律例的人
32 以色列人佇曠野的時，有一個人佇安歇日拾柴。
33 許個發見伊拾柴的人，給伊帶去摩西、亞倫，及全體會眾遐。
34 𪜶給伊關起來，猶未確定欲按怎辦伊。
35 上主對摩西講：「一定著給彼個人處死；會眾著佇營外用石頭給伊抌死。」
36 會眾給彼個人導去營外，用石頭給伊抌死，是照上主對摩西的命令。
關係衫仔鬚的條例
37 上主命令摩西
38 著吩咐以色列人：𪜶著世世代代佇衫仔墘做鬚，閣佇鬚的頂面擢一條藍色的幼帶。
39 諸個鬚是欲互恁看著，會記得遵行上主的命令，才免恁放縱家己的心及目睭的慾望，致到恁對我不忠。
40 按呢，恁才會記得實行我所有的命令，分別作聖歸恁的上帝。
41 我是上主 — 恁的上帝，曾導恁出埃及地，欲做恁的上帝。我是上主 — 恁的上帝。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。