上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
14
以色列人埋怨
全會眾就出聲，埋怨。彼暝𪜶攏啼哭。
2 以色列人埋怨摩西及亞倫，對𪜶講：「苦𣍐得阮死佇埃及！苦𣍐得死𫢶此個曠野！
3 上主哪欲導阮來到遮，害阮互人刣死，某子嘛互人掠去。阮倒去埃及豈無較好？」
4 𪜶互相講來講去：「咱著選一個首領，導咱倒去埃及。」
5 摩西及亞倫仆落佇以色列全會眾的面前。
6 探查彼個地的人中間，嫩的子約書亞及耶孚尼的子迦勒，拆裂𪜶的衫，
7 對以色列全會眾講：「阮探查經過的地是真肥閣媠的地。
8 上主若意愛咱，就會導咱入去彼個地，將彼個流奶及蜜的地賞賜咱。
9 毋拘恁毋通背叛上主，嘛毋免驚彼所在的人，𪜶會互咱吞滅。給𪜶保庇的攏已經離開；上主及咱同在，毋免驚𪜶。」
10 全體會眾講欲用石頭給𪜶抌死彼時，上主的榮光佇會幕對所有的以色列人顯現。
摩西為人民祈禱
11 上主對摩西講：「此個子民藐視我欲到底時？我佇𪜶中間行赫多神跡，𪜶到底時才會信我？
12 我欲用瘟疫拍𪜶，互𪜶𣍐當承接此個家業。毋拘我欲互你成做大國，比𪜶較強盛。」
13 摩西對上主講：「你若按呢做，埃及人一定會知，因為你曾用你的權能導諸個人民對埃及出來。
14 埃及人會對此所在的住民講此個事。此所在的住民嘛已經知，上主你及諸個人民同在；你的雲佇𪜶的頂面，佇彼中間你對𪜶顯現，互𪜶親目看見；日時用雲柱，暝時用火柱引導𪜶。
15 今你若一下手刣死諸個人民，許個聽見你的名聲的列國會講：
16 『因為上主𣍐當將此個人民導入去伊對𪜶立誓應允的地，就佇曠野給𪜶剿滅。』
17 今求我的主照你所應允的，顯出你的大權能；你曾講：
18 上主無快受氣，閣有豐盛的慈愛；
赦免罪孽及過失；
一定𣍐給有罪的判做無罪，
欲追究人的罪，對父到子，到三四代。
19 求你照你的大慈愛赦免此個人民的罪孽。親像你對導𪜶出埃及到今，常常赦免𪜶仝款。」
20 上主講：「我欲照你的話赦免𪜶。
21 毋拘，我指我的活命及我充滿全地的榮光立誓：
22 諸個人雖然有看見我的榮光，閣看著我佇埃及及曠野行過的神跡，猶試探我十遍，毋聽趁我的命令，
23 所以𪜶一定𣍐當看著我對𪜶的列祖立誓應允的地；所有藐視我的攏𣍐當看著。
24 毋拘我的僕人迦勒，我欲導伊入去伊行過的地，伊的後代嘛欲得著彼個地做家業，因為伊有及別人無仝款的心志，全心跟隨我。
25 明仔載恁著轉方向，對紅海的路去曠野，因為亞瑪力人及迦南人住佇山谷。」
上主刑罰以色列人
26 上主閣對摩西及亞倫講：
27 「此個歹的會眾對我發怨言欲到底時？以色列人對我的怨言，我攏有聽見。
28 著給𪜶講上主講：『我指我的活命立誓：我欲照恁所講的怨言對待恁。
29 恁的身屍會倒佇此個曠野。恁中間有登錄，二十歲以上，對我發怨言的人，
30 一定𣍐當入去我立誓應允欲互恁徛起的地；只有耶孚尼的子迦勒及嫩的子約書亞才會當入去。
31 毋拘恁所啲想會互人掠去的囝仔，我欲導𪜶入去，𪜶會得著恁所棄拺彼個地。
32 恁咧，恁的身屍會倒佇此個曠野。
33 恁的子兒會佇曠野流浪四十年，擔當恁無忠實的罪，直到恁佇曠野完全消滅。
34 恁探查彼個地的日子共四十日，一年抵一日，恁著對恁犯的罪孽付出代價四十年；恁就知反對我的結果是按怎。』
35 我上主已經講，我欲按呢對待所有聚集對敵我的歹會眾；𪜶欲佇此個曠野消失，死佇遮。」
36 摩西派去探查彼個地的人，倒轉來報彼所在的歹消息，致到全會眾對摩西發怨言；
37 許個報歹消息的人攏抵著瘟疫，死佇上主的面前。
38 去探查彼所在的人中間，只有嫩的子約書亞及耶孚尼的子迦勒猶活啲。
頭一遍進攻迦南
39 ( 申 1:41-46 )
摩西將諸個話給以色列眾人講，人民就真悲傷。
40 𪜶透早起來，上去山頂，講：「阮有犯罪。今阮佇遮，阮欲上去上主應允阮的地。」
41 摩西講：「恁哪欲違背上主的命令？恁按呢做𣍐成功。
42 毋通去，因為上主無及恁同在，恐驚恁互對敵拍敗。
43 亞瑪力人及迦南人攏佇恁的頭前，恁會死佇𪜶的刀下；因為恁無隨上主，所以上主無欲及恁同在。」
44 𪜶堅持欲上山頂；毋拘上主的約櫃及摩西無出營地。
45 對按呢，亞瑪力人及住佇山裡的迦南人攏落來攻擊𪜶，給𪜶拍敗，給𪜶趕到何珥瑪。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。