上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
10
銀的喇叭
上主命令摩西，講：
2 「你著用銀拍兩支喇叭，互你用來召集會眾，嘛通叫逐個營出發。
3 兩支喇叭做夥歕的時，全體會眾著去你遐，佇會幕門口聚集。
4 若干焦歕一支，眾首領，就是以色列的族長，著去你遐聚集。
5 歕緊急短音的時，紮營佇東旁的支族攏著起行。
6 第二遍歕緊急短音的時，紮營佇南旁的支族著起行；欲叫𪜶起行，一定著歕緊急短音。
7 若欲聚集會眾，恁著歕喇叭，毋拘毋通歕緊急短音。
8 亞倫的後代做祭司的，著負責歕許個喇叭；這欲做恁世世代代永遠的規例。
9 恁及侵犯恁的土地的對敵交戰的時，著用喇叭歕緊急短音，按呢上主 — 恁的上帝就會記得恁，閣欲解救恁脫離恁的對敵。
10 恁舉行慶典，佇節期及逐月日的初一，獻燒化祭及平安祭的時，嘛著歕喇叭，按呢恁的上帝就會記得恁。我是上主 — 恁的上帝。」
以色列人準備出發
11 第二年二月二十，雲對囥約櫃的會幕升高，
12 以色列人就照𪜶的行程對西奈的曠野出發；雲停佇巴蘭的曠野。
13 這是𪜶照上主互摩西的命令，第一遍起程。
14 猶大支族的大旗做頭前，部隊一隊接一隊向前行；猶大支族部隊的統領是亞米拿達的子拿順。
15 以薩迦支族部隊的統領是蘇押的子拿坦業。
16 西布倫支族部隊的統領是希倫的子以利押。
17 會幕就拆起來；革順及米拉利的子孫扛會幕出發。
18 照部隊的順序，續接出發的是呂便支族的大旗；部隊的統領是示丟珥的子以利蓿。
19 西緬支族部隊的統領是蘇利沙代的子示路蜜。
20 迦得支族部隊的統領是丟珥的子以利雅薩。
21 哥轄宗族扛聖所內面的聖物起行；會幕著佇𪜶到位以前搭好。
22 照部隊的順序，續接出發的是以法蓮支族的大旗；部隊的統領是亞米忽的子以利沙瑪。
23 瑪拿西支族部隊的統領是比大蓿的子迦瑪列。
24 便雅憫支族部隊的統領是基多尼的子亞比但。
25 最後是但支族的大旗導隊，照部隊的順序，亞米沙代的子亞希以謝做但支族的統領。
26 亞設支族部隊的統領是俄蘭的子帕結。
27 拿弗他利支族部隊的統領是以南的子亞希拉。
28 以上是以色列人部隊接部隊向前行的順序。
29 摩西對伊的丈人米甸人流珥的子何巴講：「阮欲去上主應允欲賞賜阮的地；請你及阮做夥來去，阮會好款待你；上主已經應允賜福互以色列人。」
30 伊應講：「我毋去。我欲倒去我的故鄉、我的親族遐。」
31 摩西講：「請你毋通放拺阮！你知，阮著佇曠野尋所在紮營，你會當給阮指導。
32 你若及阮做夥去，上主賜阮的福氣，阮一定攏會及你分享。」
以色列人起程
33 𪜶離開上主的山，出發行三日的路程；上主的約櫃佇頭前行三日的路程，給𪜶尋歇睏的所在。
34 𪜶拆𪜶的布棚出發；日時上主的雲佇𪜶的頂面。
35 約櫃起程的時，摩西就講：
「上主啊，求你起來！
願你趕散你的對敵！
願怨恨你的人佇你的面前逃走！」
36 約櫃停的時，摩西就講：
「上主啊，求你倒來，
住佇以色列千千萬萬的人中間！」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。