上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
17
立約的記號 — 割禮
亞伯蘭九十九歲的時，上主對伊顯現，給伊講：「我是全能的上帝，你佇我的面前行做著完全。
2 我欲及你立約，欲互你的後代加添極其多。」
3 亞伯蘭仆佇土腳；上帝閣對伊講：
4 「我及你立的約是按呢：
你欲做真多邦國的老父。
5 對今以後，你的名無閣叫做亞伯蘭，
欲叫做亞伯拉罕，
因為我欲互你做真多國的老父。
6 我欲互你的後代加添極其多，建立真多國，出真多君王。
7 「我欲堅立我及你，以及你世世代代的子孫所立永遠的約，欲做你及你的後代的上帝。
8 我欲將你現在寄居的迦南全地，賞賜你及你的後代做永遠的產業；我嘛欲做𪜶的上帝。」
9 上帝閣對亞伯拉罕講：「你及你的子孫世世代代著遵守我的約。
10 恁中間所有的查甫人攏著受割禮；這就是我及你以及你的子孫所立的約，恁一定著遵守。
11 恁著割恁的包皮；這欲做我及恁立約的記號。
12 恁逐世代的查甫嬰，無論家己生的，抑是對外族人買來的，出世第八日，攏著受割禮。
13 你家內生的及用銀買的，攏一定著受割禮；按呢我及恁所立永遠的約就佇恁的身上做記號。
14 無受割禮的查甫人，一定著對我的子民的中間革出，因為伊無割包皮，違背我的約。」
15 上帝閣對亞伯拉罕講：「你毋通閣叫你的某做莎萊，著叫伊做莎拉。
16 我欲賜福伊，互你對伊得著一個子；我欲賜福伊，互伊做真多國的老母，出真多君王。」
17 亞伯拉罕仆佇土腳啲笑，心內想：「一百歲的人豈會生子？莎拉已經九十歲，哪猶會生？」
18 亞伯拉罕對上帝講：「互以實瑪利做我的繼承人就好。」
19 上帝講：「毋是按呢，你的某莎拉欲給你生一個子，你著給伊號名叫做以撒；我欲堅立我及伊以及伊的子孫所立永遠的約。
20 關係以實瑪利，我嘛聽你的祈求。我欲賜福伊，我會互伊興旺，加添極其多。伊會生十二個族長，我嘛欲互伊成做大國。
21 到明年此個時，莎拉會給你生以撒；我欲及伊立約。」
22 上帝及亞伯拉罕講煞，就離開伊上去。
23 抵抵彼日，亞伯拉罕照上帝講的話，給伊的子以實瑪利及家內所有的查甫人，無論是家內生的抑是買來的，攏給𪜶行割禮。
24 亞伯拉罕受割禮的時九十九歲；
25 伊的子以實瑪利受割禮的時十三歲。
26 抵抵彼日，亞伯拉罕及伊的子以實瑪利做夥受割禮。
27 所有的查甫人，無論是家內生的，抑是對外族人買的，攏及伊做夥受割禮。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。