上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
15
上主及亞伯蘭立約
諸個代誌以後，上主佇異象中對亞伯蘭講：「亞伯蘭，毋免驚！我是你的保護者，我會互你豐富的報賞。」
2 亞伯蘭講：「至高的上主，你欲互我什麼？我一直無子；欲繼承我的財產的，是大馬士革人以利以謝。」
3 亞伯蘭閣講：「你無互我後嗣；出世佇我家內的僕人會繼承我的財產。」
4 上主對伊講：「你的繼承人毋是此個人；你親生的，才是你的後嗣。」
5 上主就導伊出去外面，講：「你看天，算許個星。你豈算會了？你的後代嘛會親像按呢。」
6 亞伯蘭信上主，上主就給伊算做義。
7 上主閣對伊講：「我是上主。我導你離開巴比倫的吾珥城，是欲將此個地賜你做產業。」
8 亞伯蘭講：「至高的上主，我欲按怎知會得著此個地做產業？」
9 上主給伊講：「你去掠一隻三歲的牛母、一隻三歲的山羊母、一隻三歲的綿羊、一隻斑鴿、一隻粉鳥仔子來。」
10 伊就去掠許個動物來，逐隻對中央破做兩旁，兩旁排相對；只有鳥仔無破開。
11 有禿頭鷹飛落來停佇牲生屍體的頂面，亞伯蘭給𪜶趕走。
12 日欲落的時，亞伯蘭睏重眠；忽然有互人驚惶的大烏暗罩倚。
13 上主對亞伯蘭講：「你一定著知，你的後代會寄居佇別人的地，做遐的人的奴隸，受苦四百年。
14 欺壓𪜶的國家，我會給伊審判；後來𪜶會帶真多財物對遐出來。
15 你會食長歲壽，互人安葬，平平安安轉去恁祖先遐。
16 到第四代，𪜶會倒來遮，因為亞摩利族的罪猶未貫滿。」
17 日落天暗，忽然有出煙的爐，及啲𤏸的火把，對許個破旁的肉的中間經過。
18 彼日上主及亞伯蘭立約，講：「我欲將對埃及的邊界到幼發拉底河此個地賜互你的後代，
19 就是將基尼人、基尼洗人、甲摩尼人、
20 赫人、比利洗人、利乏音人、
21 亞摩利人、迦南人、革迦撒人、耶布斯人𪜶的地賜互你的後代。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。