上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
14
亞伯蘭解救羅得
佇暗拉非做示拿王，亞略做以拉撒王，基大老瑪做以攔王，提達做戈印王的時，
2 𪜶聯合來攻打所多瑪王比拉、蛾摩拉王比沙、押瑪王示納、洗扁王善以別，以及比拉王 (比拉就是瑣珥)。
3 彼四個王攏來西訂山谷會合；西訂山谷就是現在的鹽海。
4 𪜶互基大老瑪統治十二年久；到第十三年背叛。
5 第十四年，基大老瑪導許個及伊結盟的王，到亞斯他錄‧加寧刣贏利乏音人，佇哈麥刣贏蘇西人，佇基列亭平原刣贏以米人，
6 佇以東山區刣贏何利人，一直到倚近曠野的伊勒‧巴蘭。
7 𪜶倒轉到隱‧密巴，就是加低斯，攻打亞瑪力全地區，及住佇哈洗遜‧他瑪的亞摩利人。
8 對按呢，所多瑪王、蛾摩拉王、押瑪王、洗扁王、比拉王 (比拉就是瑣珥)，攏來西訂山谷排陣，欲及𪜶交戰，
9 就是及以攔王基大老瑪、戈印王提達、示拿王暗拉非、以拉撒王亞略交戰；四個王對抗五個王。
10 西訂山谷有真多打馬膠坑；所多瑪及蛾摩拉此兩個城的王逃走，跋落去彼內面；其他的人逃走去山頂。
11 彼四個王將所多瑪及蛾摩拉的財物以及糧食攏搶走，做𪜶去。
12 閣將亞伯蘭的侄仔羅得及伊的財物攏搶去；彼時羅得住佇所多瑪。
13 有一個逃走的人來給希伯來人亞伯蘭報告此個消息。彼時，亞伯蘭住佇亞摩利人幔利的橡樹遐；幔利、以實各，及亞乃攏是親族，有及亞伯蘭結盟。
14 亞伯蘭聽著伊的侄仔互人掠去，就導許個佇𪜶兜出世，受訓練的壯丁三百十八人，追趇彼四個王到但。
15 到暗時，伊及伊的僕人分隊攻擊對敵，給𪜶趇到大馬士革北旁的何巴。
16 伊將所有互𪜶搶去的財物搶倒轉，嘛將伊的侄仔羅得及羅得的財物、婦女，以及其他受掠的人攏搶轉來。
麥基洗德祝福亞伯蘭
17 亞伯蘭刣贏基大老瑪以及及伊結盟的王倒來的時，所多瑪王來沙微山谷迎接伊；沙微山谷就是王的山谷。
18 至高上帝的祭司撒冷王麥基洗德嘛帶餅及酒來，
19 給亞伯蘭祝福，講：
願創造天地、至高的上帝賜福互亞伯蘭！
20 願互亞伯蘭刣贏對敵的至高上帝得著稱讚！
亞伯蘭將攏總所得著的的十分一送互麥基洗德。
21 所多瑪王給亞伯蘭講：「人交互我，財物攏互你。」
22 亞伯蘭給所多瑪王講：「我指上主 — 創造天地、至高的上帝咒誓，
23 你所有的物，連一條線、一條鞋帶我攏毋提，才免你講：『我互亞伯蘭好額。』
24 毋拘，壯丁的糧食你著補我；及我做夥去的亞乃、以實各、幔利應得的份，著出在𪜶提。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。