上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
20
死刑的條例
上主閣命令摩西
2 著對以色列人宣布：
無論是以色列人，抑是寄居佇恁中間的外族人，若有人將家己的子查某子獻互摩洛，一定著給伊處死；彼所在的人著用石頭給伊抌死。
3 我嘛欲對彼個人變面，給伊對人民的中間革出，因為伊將子查某子獻互摩洛，拍垃墋我的聖所，褻瀆我的聖名。
4 彼所在的人若看著彼個人獻子查某子互摩洛，毋拘佯毋知，無給伊處死，
5 我欲對彼個人及伊的家族變面，將伊及隨伊去拜摩洛行邪淫的人，攏對人民的中間革出。
6 若有人去尋牽亡的抑是童乩桌頭，隨𪜶去拜偶像行邪淫，我欲對彼個人變面，給伊對人民的中間革出。
7 所以恁著分別作聖，成做聖潔，因為我是上主 — 恁的上帝。
8 恁著切實遵行我的規例。我是給恁分別作聖的上主。
9 若有人咒詛父母，一定著給伊處死；伊著對家己的罪負責任。
10 若有人及別人的某私通，一定著給彼兩個人處死。
11 及老父的某私通，就是侮辱家己的老父，一定著給彼兩個人處死；𪜶著對家己的罪負責任。
12 若有人及新婦私通，一定著給𪜶處死；𪜶做亂倫的代誌，著對家己的罪負責任。
13 若有查甫人及查甫人有性關係，親像及婦仁人仝款，做通厭惡的事，一定著給𪜶處死；𪜶著對家己的罪負責任。
14 若有人娶某，閣娶伊的丈姆，這是亂倫見笑的事；此三個人，著給𪜶燒死，才免恁中間有此款亂倫見笑的事。
15 若有人及牲生交合，一定著給伊處死，嘛著給彼隻牲生刣死。
16 若有婦仁人及牲生交合，一定著給伊及彼隻牲生處死；𪜶著對家己的罪負責任。
17 人若娶家己的姊妹，無論仝父的抑是仝母的，這是見笑的代誌；著將𪜶對人民的中間革出。伊及家己的姊妹有亂倫的關係，著對家己的罪負責任。
18 若有人及經期中的婦仁人有性關係，著將𪜶對人民的中間革出，因為𪜶違犯潔淨的條例。
19 毋通及阿姨抑是阿姑有性關係，這是侮辱骨肉至親；𪜶著對家己的罪負責任。
20 若有人及伊的阿嬸抑是阿姆有性關係，就是侮辱伊的阿叔抑是阿伯；𪜶著對家己的罪負責任，一世人無後嗣。
21 若有人娶家己兄弟的某，這是侮辱伊的兄弟，是通厭惡的事；𪜶一定無後嗣。
22 恁著切實遵行我所有的規例及命令，才免我導恁入去徛起的地給恁吐出來。
23 我佇恁的面前趕出去的人民，恁毋通學𪜶的風俗；因為𪜶有做諸個事，所以我厭惡𪜶。
24 我曾給恁講，我欲將此塊流奶及蜜的地賜互恁，互恁承接做產業。我是上主 — 恁的上帝，對萬族的中間給恁分別出來。
25 所以，恁著分別清氣及無清氣的走獸及鳥類。我定做無清氣的，無論是走獸、鳥類，抑是佇土腳啲爬的動物，恁毋通因為𪜶互家己成做通厭惡的。
26 恁著歸屬我成做聖，因為我上主是聖，有將恁對萬族的中間分別出來，做我的子民。
27 牽亡的，抑是童乩桌頭，無論是男是女，一定著給𪜶處死，用石頭給𪜶抌死；𪜶著對家己的罪負責任。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。