上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
18
禁止淫亂的命令
上主命令摩西
2 著對以色列人宣布：我是上主 — 恁的上帝。
3 恁曾住過埃及，遐的人的行為恁毋通學。我欲導恁進入迦南地，遐的人的行為恁毋通做，嘛毋通隨𪜶的風俗。
4 恁著切實遵行我的命令及規例。我是上主 — 恁的上帝。
5 恁著遵守我的規例及命令；人若遵守諸個，就會得著活命。我是上主。
6 恁攏毋通及近親有性關係。我是上主。
7 毋通及老母有性關係，來凌辱你的老父；伊是你的老母，毋通露現伊的下體。
8 毋通及你的老父其他的某有性關係，來凌辱你的老父。
9 毋通及你的姊妹有性關係，無論是仝父的抑是仝母的、佇厝內抑是外面生的，攏毋通露現𪜶的下體。
10 毋通及你的查某孫，無論是內孫抑是外孫有性關係，因為𪜶的下體是你家己的下體。
11 毋通及仝父無仝母的姊妹有性關係。
12 毋通及你的阿姑有性關係；伊是你的老父的骨肉至親。
13 毋通及你的阿姨有性關係；伊是你的老母的骨肉至親。
14 毋通及你的阿姆、阿嬸有性關係。
15 毋通及你的新婦有性關係。
16 毋通及你的兄嫂、弟婦有性關係。
17 及你有性關係的查某人，你毋通閣及伊的查某子有性關係，嘛毋通娶彼個查某人的查某孫做某；𪜶是伊的骨肉至親。這是亂倫見笑的事。
18 某猶活啲，毋通娶伊的姊妹來做伊的對頭。
19 婦仁人經期中無清氣的時，毋通及伊有性關係。
20 毋通及別人的某有性關係來拍垃墋家己。
21 毋通獻你的子查某子互摩洛。毋通褻瀆你的上帝的名。我是上主。
22 毋通及查甫人有性關係，親像及婦仁人仝款；這是真通厭惡的代誌。
23 毋通及任何牲生交合來拍垃墋家己；婦仁人嘛毋通及牲生交合；這是違反自然的代誌。
24 恁毋通做以上禁止的事來拍垃墋家己；因為我啲欲佇恁面前趕出去的外族人，有做諸個事來拍垃墋家己。
25 𪜶按呢做嘛污染土地，所以我刑罰土地，互土地將許個住民吐出去。
26 所以恁著遵守我的規例及命令；諸個通厭惡的事，無論是在地人，抑是寄居佇恁中間的外族人攏毋通做。
27 佇恁以前此個土地的住民有做諸個通厭惡的事，地煞受污染。
28 恁毋通污染彼個土地，才免地將恁吐出去，親像將恁以前的住民吐出去仝款。
29 若有人做以上禁止的事，彼個人著對人民的中間革出。
30 恁著遵守我的命令，才免恁去隨以前的住民通厭惡的風俗，煞拍垃墋家己。我就是上主 — 恁的上帝。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。