上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
12
上帝呼召亞伯蘭
上主對亞伯蘭講：「你著離開本地、本族，恁老父的家，去我欲指示你的地。
2 我欲互你成做大國，欲賜福你，互你的名受敬重，你嘛欲互人得著福氣。
3 祝福你的，我欲賜福互𪜶；
咒詛你的，我欲咒詛伊；
地上萬族欲因為你得著福氣。」
4 亞伯蘭照上主的吩咐，就出去，羅得嘛及伊去。亞伯蘭離開哈蘭的時七十五歲。
5 亞伯蘭導伊的某莎萊及伊的侄仔羅得出發，閣帶𪜶佇哈蘭所積聚的財物、得著的僕人女婢，欲去迦南地。
𪜶來到迦南地，
6 亞伯蘭繼續行，來到示劍的摩利橡樹遐；彼時迦南人住佇彼個地。
7 上主對亞伯蘭顯現，講：「我欲將此個地賞賜你的後代。」伊就佇遐為著對伊顯現的上主起一座祭壇。
8 伊閣對遐徙到伯特利東旁的山區，搭布棚，佇遐為著上主起一座壇，求叫上主的名；彼個所在西旁是伯特利，東旁是艾。
9 亞伯蘭漸漸徙去南旁的尼革夫。
亞伯蘭落去埃及
10 彼個地飢荒真嚴重。亞伯蘭落去埃及，寄居佇遐。
11 啲欲到埃及的時，亞伯蘭對伊的某莎萊講：「我知你是生做真媠的婦仁人；
12 埃及人若看著你，會講：『此個是伊的某。』𪜶會給我刣死，互你活啲。
13 拜託你講你是我的小妹，互我通因為按呢平安無事，免互人刣死。」
14 亞伯蘭到埃及的時，埃及人看著彼個婦仁人有夠媠。
15 法老的人臣看著伊，就佇法老的面前謳咾伊的媠。彼個婦仁人就互人帶入去法老的王宮。
16 法老因為此個婦仁人好款待亞伯蘭；亞伯蘭就得著牛、羊、公的驢、母的驢、駱駝，以及僕人及女婢。
17 上主因為亞伯蘭的某莎萊的緣故，降大災禍佇法老及伊的全家。
18 法老就叫亞伯蘭來，講：「你哪對我做此款代誌？無給我講伊是你的某？
19 是按怎你講伊是你的小妹，煞害我給伊娶來做某？今你的某佇遮，導轉去。」
20 法老就命令部下送亞伯蘭、伊的某，及伊一切所有的離開。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。