上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
啟示錄
21
新天新地
後來，我有看見新的天新的地，因為前的天前的地已經過去，海嘛無去。
2 我閣看見聖城，新的耶路撒冷，對天頂上帝遐降落來，親像新娘妝飾好勢欲迎接丈夫。
3 我閣聽著有大的聲對寶座發出，講：「看啊，上帝的會幕佇人的中間！上帝欲及𪜶做夥徛起；𪜶欲做伊的子民；上帝欲親身及𪜶同在，做𪜶的上帝。
4 伊欲拭去𪜶目睭攏總的目屎；無閣有死失，嘛無閣有哀傷、喉叫、痛疼，因為前的代誌已經過去。」
5 後來，坐佇寶座彼位講：「看啊，我將萬物攏換新！」伊閣講：「著寫起來，因為諸個話真實可靠。」
6 伊閣給我講：「完成啦！我是阿爾法及亞米茄，是開始及結束。嘴焦的人我欲將活命水的水泉白白互𪜶飲。
7 得勝的人會承接諸個；我欲做𪜶的上帝，𪜶欲做我的子兒。
8 毋拘，許個無膽的、背信的、腐敗的、刣人的、淫亂的、行邪術的、拜偶像的，以及所有講白賊的，𪜶著去的所在是彼個用火及硫磺啲燒的湖，此個就是第二遍的死。」
新耶路撒冷
9 後來，七個天使，就是提七塊碗貯滿路尾七項災禍的，其中一個來對我講：「來，我欲報你看新娘，就是羊羔的某。」
10 我受聖神感動，互天使導到一座大閣高的山，互我看對天頂上帝遐降落來的聖城耶路撒冷。
11 此個城有上帝的榮光；城的光親像上寶貴的寶石，親像碧玉，親像水晶赫呢光亮。
12 城有大閣高的牆，城牆有十二個門，諸個門有十二個天使啲顧守，有刻以色列子孫十二支族的名；
13 東旁有三個門，西旁有三個門，南旁有三個門，北旁有三個門。
14 城牆有十二個地基，地基頂有羊羔的十二使徒的十二個名。
15 對我講話的天使有提一支金蘆竹的尺，欲量彼個城、城門，及城牆。
16 城是四角形，長闊相像。天使用尺量城：有兩千四百公里，長、闊、高攏相像。
17 天使嘛照人的寸尺量城牆，高六十公尺。
18 城牆是用碧玉造的，城是用親像玻璃清亮的純金起的。
19 城牆的地基用逐種寶石裝飾：頭一個地基是碧玉，第二個是藍寶石，第三個是綠瑪瑙，第四個是綠寶石，
20 第五個是紅瑪瑙，第六個是紅寶石，第七個是黃橄欖石，第八個是翠蒼玉，第九個是黃玉，第十個是翡翠玉，第十一個是紫瑪瑙，第十二個是紫水晶。
21 彼十二個門是十二粒真珠，逐個門是用一粒真珠做的。城的街路是純金，親像透明的玻璃。
22 佇城內我無看著聖殿，因為全能的主上帝及羊羔就是此個城的聖殿。
23 此個城無需要日頭抑是月娘來照，因為上帝的榮光啲照，閣羊羔就是此個城的燈。
24 列邦會靠燈的光行路；地上君王會將𪜶的榮華帶來互此個城。
25 日時，城門攏𣍐關；佇遐攏無暝時。
26 人會將列邦的榮光及尊貴帶入來此個城。
27 毋拘，無清氣的物，以及行為可惡及講白賊的人絕對𣍐用得入去；只有名有記載佇羊羔的活命冊的人才會當入去。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。