上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
啟示錄
20
一千年
後來，我有看見一個天使對天頂落來，手提無底深坑的鎖匙及一條大條鐵鍊。
2 伊掠彼隻惡龍，就是彼尾老蛇，是魔鬼，是撒旦，給伊縛一千年。
3 天使給伊㧒落無底深坑，然後給無底深坑關密，閣用印封起來，互伊𣍐當閣去迷惑列邦，一直到一千年滿。此個期限過了，伊一定著暫時受解放。
4 我有閣看見幾若個寶座，坐佇寶座的有得著審判的權柄。我嘛有看見許個為著耶穌的見證及上帝的道互人斬頭的人的靈魂。諸個人毋曾拜獸，嘛毋曾拜獸的像，𪜶的頭額抑是手無接受獸的記號。𪜶攏閣活及基督做夥統治一千年。
5 所賰的死人到一千年滿的時才會閣活。這是頭一遍的閣活。
6 有份佇頭一遍閣活的人真有福氣，𪜶是聖潔的人。第二遍的死無權通給𪜶管轄，𪜶會做上帝及基督的祭司，嘛會及基督做夥統治一千年。
撒旦戰敗
7 一千年滿的時，撒旦會受解放出監。
8 伊會出去迷惑地上四方的列邦，就是歌革及瑪各，聚集𪜶去交戰；𪜶的數目親像海沙赫呢多。
9 𪜶進軍遍滿全地，圍困信徒的營及上帝所疼的城。毋拘有火對天降落給𪜶燒滅。
10 彼個迷惑𪜶的魔鬼受㧒落火及硫磺的湖；彼隻獸及彼個假先知已經佇遐。𪜶會暝日受苦楚，永遠𣍐停。
最後的審判
11 後來，我有看見一個白色的大寶座，及坐佇彼頂面彼位；天及地對伊的面前逃走，就無閣看見。
12 我閣有看見死去的人，無論卑賤抑是尊貴，攏徛佇寶座前。記錄的冊攏搋開；另外一本活命冊嘛搋開。死去的人照𪜶的行為，根據諸個冊所記載的受審判。
13 海將伊內面的死人交出來；死亡及陰府嘛將𪜶內面的死人攏交出來。逐個人攏照家己的行為受審判。
14 後來，死亡及陰府受㧒落火湖。此個火湖就是第二遍的死。
15 名無記載佇活命冊的人攏受㧒落火湖。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。