下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
1
上帝的創造
起頭，上帝創造天及地。
2 地是渾沌，猶未成形；深淵的頂面烏烏暗暗；上帝的神運行佇水面。
3 上帝講「著有光」，就有光。
4 上帝看光是好；上帝將光及暗分開。
5 上帝叫光做日時，叫暗做暝時。有下昏有早起，是頭一日。
6 上帝講：「諸個水的中間著有穹蒼，將水頂下隔開。」
7 上帝就造穹蒼，將穹蒼下面的水及穹蒼頂面的水分開；代誌就按呢完成。
8 上帝叫穹蒼做天。有下昏有早起，是第二日。
9 上帝講：「天下面諸個水著集中佇一所在，互焦地出現。」代誌就按呢完成。
10 上帝叫焦地做地，叫集中的水做海；上帝看這做好。
11 上帝講：「地著有植物：會結籽的菜蔬，及會結果子內面有籽的樹；各照𪜶的種類。」代誌就按呢完成。
12 地就照種類生出植物，就是會結籽的菜蔬，及有種籽的果子樹；上帝看這做好。
13 有下昏有早起，是第三日。
14 上帝講：「天頂的穹蒼著有光體，來分別日及暝，嘛做季節、日、年的記號，
15 閣佇穹蒼發光照地面。」代誌就按呢完成。
16 上帝就造兩個大的光體，大的管日時，細的管暝時；嘛造星辰。
17 上帝將𪜶下佇天頂的穹蒼，互𪜶照地面，
18 嘛管日及暝，分別光及暗；上帝看這做好。
19 有下昏有早起，是第四日。
20 上帝講：「水內著生湠真多生物；地的頂面、天裡的穹蒼著有鳥仔啲飛。」
21 上帝就創造海裡的大魚，及水內生湠真多的生物，各照𪜶的種類；閣創造逐款飛鳥，各照𪜶的種類；上帝看這做好。
22 上帝賜福𪜶，講：「著生湠，著加添，互海裡充滿生物，互地上的鳥仔生湠真多。」
23 有下昏有早起，是第五日。
24 上帝講：「地著生出生物，各照𪜶的種類；有牲生、啲爬的動物、走獸，各照𪜶的種類。」代誌就按呢完成。
25 上帝就照𪜶的種類造地上的走獸、牲生，及一切啲爬的動物；上帝看這做好。
26 上帝講：「咱著照咱的形像，照咱的款式造人，互𪜶管理海裡的魚、天裡的鳥、地上的牲生及野獸，以及佇地上啲爬的動物。」
27 上帝就照伊家己的形像創造人；伊照伊的形像創造𪜶，有男有女。
28 上帝賜福𪜶，對𪜶講：「著生湠，加添真多，充滿全地，閣治理全地，嘛著管理海裡的魚、天裡的鳥，及地上所有會振動的生物。」
29 上帝閣講：「我將全地所有會結籽的菜蔬，及一切有種籽的果子樹，攏互恁做食物。
30 地上逐種的走獸、空中一切的鳥仔，及佇地上所有啲爬的活物，我將青色的菜蔬互𪜶做食物。」代誌就按呢完成。
31 上帝看伊所造的一切真好。有下昏有早起，是第六日。
下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。