上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
啟示錄
12
婦仁人及惡龍
後來，佇天頂有一個大景象出現：有一個婦仁人身穿日頭，腳踏月娘，頭戴十二粒星的花冠。
2 伊懷孕欲生子，啲催陣，痛疼，喉叫。
3 佇天頂閣有一個景象出現：有一隻大隻赤色的惡龍，伊有七個頭，十支角；七個頭戴七頂王冠。
4 伊用尾溜給天頂三分一的星掃落地。彼隻惡龍徛佇啲欲生子的婦仁人的面前，聽候伊的子生出來通給伊吞落去。
5 彼個婦仁人生一個查甫子，此個子欲用鐵柺治理萬國。毋拘，伊的子互人接去上帝面前，到伊的寶座遐。
6 彼個婦仁人逃走去曠野，佇遐上帝有給伊備辦一個所在，互伊通得著照顧一千兩百六十日。
7 後來佇天頂有戰爭。米迦勒及伊的使者去及彼隻惡龍交戰，惡龍嘛及伊的使者起來應戰。
8 惡龍刣輸，伊及伊的使者佇天頂就無所在通住。
9 彼隻大隻惡龍就受㧒落去；伊就是彼尾老蛇，叫做魔鬼，撒旦，全人類的迷惑者；伊受㧒落地，伊的使者嘛攏及伊做夥受㧒落地。
10 後來我聽見佇天頂有大的聲講：
現在咱的上帝的拯救、權能，及主權已經實現！
伊已經顯示伊的基督的權柄！
彼個暝日佇咱的上帝面前
控告咱的兄弟姊妹的已經受㧒落去。
11 咱的兄弟姊妹靠羊羔的血，
及𪜶所見證的信息已經較贏彼隻惡龍；
𪜶甚至到死都無惜家己的性命。
12 所以，諸個天及𫢶佇彼中間的，
攏著歡喜！
總是，地及海慘啊，
因為魔鬼已經氣沸沸落去恁遐，
伊知影家己的時無久啦。
13 彼隻惡龍一下知家己已經受㧒落地，就去趇彼個生查甫子的婦仁人。
14 婦仁人有得著大隻鷹鳥的兩支翼通飛去曠野，到伊家己的所在，佇遐得著照顧三年半久，無受著老蛇的攻擊。
15 彼尾蛇佇婦仁人的後面，對嘴吐出親像大河的水欲給伊沖走
16 毋拘，大地幫贊婦仁人，開嘴給彼隻惡龍吐出來的河水吞落去。
17 惡龍就對婦仁人發受氣，去及婦仁人其他的子孫交戰，就是許個遵守上帝的命令以及持守耶穌的見證的人。
18 後來，彼隻惡龍去徛佇海坪的沙頂。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。