上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
啟示錄
11
兩個見證人
我有領受一支尺，形親像柺仔，閣有聲對我講：「起來，去量上帝的聖殿及祭壇，閣算殿內敬拜的人數。
2 毋拘，聖殿外口的埕毋通量，因為外埕已經交互外邦人；𪜶會踐踏聖城四十二月日久。
3 我欲准我兩個見證人穿麻衫，有權傳道一千兩百六十日久。」
4 此兩個見證人就是徛佇全地的主面前的兩欉橄欖樹及兩支燈台。
5 若有人欲害𪜶，𪜶會對嘴吐出火，將對敵燒滅；若有人欲害𪜶，一定會按呢受殺害。
6 此兩個見證人有權通關天，互𪜶傳道的期間無落雨；𪜶嘛有權掌管水，互伊變做血；閣照𪜶所愛通不管時降逐種災害攻擊大地。
7 𪜶見證完成了後，對無底深坑上來彼隻獸會及𪜶交戰，將𪜶征服，給𪜶刣死。
8 𪜶的身屍會倒佇大城市的街路；此個城市人給伊比並做所多瑪抑是埃及；𪜶的主嘛佇遐互人釘十字架。
9 三日半久，對逐個民族、逐個族群、逐款語言、逐個邦國，有人會來看𪜶的身屍，毋准人給𪜶埋葬佇墓裡。
10 住佇地面上的人會因為𪜶的死來歡喜快樂，交換禮物；因為此兩個先知有互地上的人受著苦楚。
11 三日半過了，對上帝遐有活氣入去𪜶內面，𪜶就𬦰起來徛；看著的人大驚惶。
12 𪜶兩人聽見對天來大的聲對𪜶講：「起來遮！」𪜶就佇對敵的面前坐雲上天。
13 抵彼時有大地動，彼座城倒十分一；因為地動死去的有七千人；其他的人大驚惶，歸榮光互天頂的上帝。
14 第二個災禍已經過；第三個災禍連鞭到。
第七支喇叭
15 第七個天使歕伊的喇叭，天頂有大的聲，講：
世間的國成做咱的主及伊所設立的基督的國；
伊欲永永遠遠作王掌權。
16 佇上帝面前坐佇𪜶家己座位的二十四個長老，面仆落去敬拜上帝，
17 講：
現在存在、過去存在全能的主上帝，
阮感謝你；
因為你已經掌握大權；
你已經作王掌權。
18 外邦大受氣，
你嘛發受氣；
死人受審判的時機到啦。
你的僕人眾先知、
你的信徒，及敬畏你的名的，
無論大的細的，你報賞𪜶的時機到啦。
敗壞地的，你敗壞𪜶的時機到啦。
19 上帝佇天頂的聖殿就開；佇聖殿內伊的約櫃看現現；忽然有熠爁、響聲、雷彈、地動，及大雹。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。