上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
啟示錄
2
互以弗所的教會的批
「你著寫批互以弗所的教會的天使，講：
「『正手挺七粒星，佇七支金燈台的中間啲行彼位按呢講：
2 我知你的所做；你按怎啲勞苦及吞忍。我知你𣍐容忍歹人；你嘛曾考驗許個自稱是使徒其實毋是的人，看出𪜶是白賊的。
3 你有吞忍，曾為著我的名忍受艱苦，攏無厭倦。
4 毋拘，有一項代誌我欲給你責備，就是你已經放拺你當初的疼心。
5 所以，著會記得你對叨位墮落；著悔改，做你當初所做的工作。若無，我會去你遐，將你的燈台對原位徙開。
6 不過，你猶有一項可取的事，就是你嘛及我仝款怨恨尼哥拉黨的行為。
7 「『有耳孔的人攏著聽聖神給諸個教會講的話。
「『得勝的人，我欲互伊食上帝的樂園中彼欉活命樹的果子。』」
互士每拿的教會的批
8 「你著寫批互士每拿的教會的天使，講：
「『起頭的及煞尾的，死有閣活彼位按呢講：
9 我知你的患難及散赤；其實你是好額。我知你有受著自稱猶太人的人的誹謗；其實𪜶毋是猶太人，是撒旦的集團。
10 毋免驚你啲欲受的苦難。你看，魔鬼啲欲將恁中間幾若人關落監，欲給恁考驗，恁會受苦難十日。你著盡忠到死，我會賜你活命的花冠。
11 「『有耳孔的人攏著聽聖神給諸個教會講的話。
「『得勝的人絕對𣍐受著第二遍死的災害。』」
互別迦摩的教會的批
12 「你著寫批互別迦摩的教會的天使，講：
「『有雙面利的劍彼位按呢講：
13 我知你住叨位，就是有撒旦的座位遐。你有堅守我的名，甚至我忠實的見證人安提帕佇恁中間，就是撒旦住的所在，受殺害的時，你嘛無否認對我的信仰。
14 毋拘我有幾若項代誌欲給你責備：因為佇你遐有人執守巴蘭的教示，此個巴蘭有教巴勒去引誘以色列的子孫，互𪜶食祭偶像的物，閣行姦淫。
15 親像按呢，你遐嘛有人執守尼哥拉黨的教示。
16 所以，著悔改。若無，我連鞭會去你遐，用我嘴內的劍及𪜶交戰。
17 「『有耳孔的人攏著聽聖神給諸個教會講的話。
「『得勝的人我欲將保存起來的嗎哪互伊，閣欲互伊一塊白石，石的頂面有寫新的名；此個名，領受的人以外，無人識。』」
互推雅推喇的教會的批
18 「你著寫批互推雅推喇的教會的天使，講：
「『上帝的子，就是目睭親像火焰，腳親像光亮的銅彼位按呢講：
19 我知你的行為、你的疼、信心、服事，及吞忍；閣知你最近的所做比起頭的較好。
20 毋拘，有一項代誌我欲給你責備，就是你容允自稱作先知的婦仁人耶洗碧；伊教示閣迷惑我的僕人去犯姦淫閣食祭偶像的物。
21 我有互伊時間通悔改，毋拘伊毋肯悔改離開淫行。
22 看啊，我欲互伊艱苦倒床；許個及伊犯姦淫的人若無悔改，停止𪜶及伊的淫行，我嘛欲互𪜶受大苦難。
23 我欲刣死許個隨伊的人。按呢攏總的教會就會知我是監察人的心思意念的，我欲照恁逐個人的行為給恁報應。
24 「『總是恁諸個其他的推雅推喇人，恁無受此款教導，毋識所謂撒旦的奧祕的人，我給恁講，我𣍐加添別款的重擔互恁。
25 毋拘，恁著堅守恁已經有的，直到我來。
26 「『得勝閣繼續為著我做工到路尾的人，我欲互伊權柄通治理萬國；
27 伊欲用鐵柺治理𪜶，親像摃碎瓷器；
28 我嘛有按呢對我的父領受權柄。得勝的人，我嘛欲互伊啟明星。
29 「『有耳孔的人攏著聽聖神給諸個教會講的話。』」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。