上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
猶大書
1 我是耶穌基督的僕人，雅各的兄弟猶大，我寫批互許個受上帝選召，得著父上帝的疼，受耶穌基督保祐的人。
2 願上帝豐豐富富賜恁憐憫、平安，及慈愛！
假教師
3 親愛的朋友，我早就一直愛欲寫批互恁，及恁談論咱攏有份的拯救。我感覺此陣需要隨時寫批給恁鼓勵，愛恁為著我最後一遍傳授互信徒此個信仰繼續奮鬥。
4 因為有一寡無敬畏上帝的人偷偷仔鑽入來咱中間，利用咱的上帝的恩典做放縱的藉口，閣毋認唯一的主宰咱的主耶穌基督。真早以前聖經就預言諸個人一定著受刑罰。
5 雖然恁知諸個一切的事，我猶久欲給恁提醒，主一遍就完全將以色列人民對埃及地救出來，後來毀滅許個毋信的人。
6 閣許個無守本分，離開本位的天使，𪜶互鎖鍊永遠鍊佇烏暗的深淵；上帝給𪜶關佇遐，聽候審判的大日子。
7 住佇所多瑪、蛾摩拉，及附近城市的人，嘛及許個天使像款淫亂，放縱反自然的性慾，受著永遠𣍐化的火的刑罰，做眾人的警戒。
8 像款，諸個空思妄想的人嘛損害家己的身軀，藐視上帝的權威，侮辱天頂許個尊榮者。
9 天使長米迦勒為著摩西的遺體及魔鬼爭論的時，嘛毋敢用誹謗的話責備，只有講：「主譴責你！」
10 毋拘諸個人誹謗𪜶所無了解的事；𪜶親像野獸去做照本能所知的代誌，結果受毀滅。
11 𪜶慘啊！因為𪜶行該隱的路，閣為著錢財陷落佇巴蘭的錯誤。𪜶及可拉像款，因為背叛來滅亡。
12 𪜶毋知見笑，大食大飲，家己顧食，來破壞恁的愛餐。𪜶親像雲互風吹來吹去，攏無落雨；親像樹到秋天亦無結果子，互人連根摳起來，死甲焦硞硞。
13 𪜶嘛親像波浪噴出水沫，露出家己的見笑；親像離開軌道的星落入去上帝為著𪜶永遠保留彼個烏暗的深淵。
14 亞當的第七代孫以諾預言諸個人講：「恁看！主有導千千萬萬的聖天使來，
15 欲審判所有的人，刑罰一切無敬虔的罪人，因為𪜶用無敬虔的方法做一切無敬虔的事，閣講褻瀆上帝的話。」
16 諸個人不時嗷嗷唸，埋怨，趁私慾做代誌，講大話，為著利益扶挺別人。
警告及教訓
17 親愛的朋友，著會記得咱的主耶穌基督的使徒預言的話。
18 𪜶有給恁講：「佇末期，有一寡趁家己無敬虔的慾念做代誌的人會出現，𪜶愛恥笑別人的信仰。」
19 諸個是製造紛爭，受本性支配，無及聖神結連的人。
20 恁咧，親愛的朋友，著將家己建立佇恁至聖的信仰頂面；著靠聖神祈禱。
21 著𫢶佇上帝的疼保守家己，仰望咱的主耶穌基督的憐憫，直到得著永遠的活命。
22 對一寡心存憢疑的人，著憐憫𪜶；
23 有一寡人，著對火中給𪜶救出來；閣有一寡人，著憐憫𪜶，毋拘著家己警戒，連𪜶互情慾沐著的衫都著厭惡。
頌讚
24 上帝會保護恁𣍐墮落，互恁無缺點，歡歡喜喜徛佇伊榮耀的面前。
25 願獨一的上帝 — 咱的救主，通過咱的主耶穌基督得著榮光、尊嚴、能力，及權柄，對萬古到現在，直到永遠。阿們！
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。