上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
彼得前書
3
婦仁人及丈夫
像款，恁作婦仁人的著順服家己的丈夫。按呢，𪜶中間若有人無順趁道理，會對恁的好品行受感化；恁攏毋免講半句話，
2 因為𪜶會看出恁的生活純潔閣敬虔。
3 恁毋通靠編頭毛，掛金器，穿媠衫等妝飾，
4 著靠內在的媠，用溫柔及安靜的性情做𣍐敗壞的妝飾；這佇上帝的面前是上寶貴的。
5 因為早時仰望上帝許個聖潔的婦仁人嘛是按呢妝飾家己，順服𪜶的丈夫；
6 親像莎拉順從亞伯拉罕，稱呼伊做「主人」。恁若做好事，無受恐嚇致到驚惶，就是莎拉的查某子。
7 仝款，恁作丈夫的著及家己的婦仁人做夥生活，體貼𪜶肉體上較軟弱。著給𪜶尊重，因為𪜶嘛及恁平平是分享上帝恩賜的活命的人。按呢，恁的祈禱才𣍐受阻礙。
為著義受苦
8 總講，恁攏著同心，同情，相疼親像兄弟姊妹，有仁慈，心存謙卑；
9 無用歹報歹，抑是用侮辱對付侮辱；顛倒著用祝福回報，因為恁是為著此個受呼召，互恁通承受福氣。
10 因為聖經有記載：
人若愛性命，
愛過好日子，
著禁家己的舌無講歹話，
禁止嘴唇無講詭詐。
11 著拒絕歹，做好事，
熱心追求和平。
12 因為主的目睭看顧義人，
伊的耳孔聽𪜶的祈禱；
毋拘伊會對作歹的人變面。
13 恁若熱心作好，啥人會害恁？
14 總是恁若為著義受苦，就有福氣。毋免驚人的威脅，嘛毋免著急不安。
15 著尊崇基督做主。若有人問恁心中的向望，著不時準備好勢通對𪜶辯明。
16 不過著用溫和及尊重的態度來回答。著有清白的良心，通佇恁受侮辱的時互許個侮辱恁的人看見恁靠基督所表現的好品行感覺見笑。
17 受苦若是上帝的旨意，作好來受苦比作歹來受苦較好。
18 因為基督嘛曾為著罪受苦，一遍就完成；義的人替不義的人受苦，是為著欲導恁到上帝的面前。佇肉體，伊受處死；佇靈，伊有閣活。
19 通過伊的靈，伊嘛有去對許個佇監內的靈傳道，
20 就是挪亞準備大船的時，上帝有耐心聽候許個毋順服伊的人。當時進入大船的人無幾個，只有八個，𪜶有對水裡得著救。
21 此個水預表洗禮，毋是欲洗除恁身軀的垃屑，是欲互恁有清白的良心通對上帝決志；此個洗禮通過耶穌基督的閣活互恁得著拯救。
22 伊已經上天，現在佇上帝的正旁啲掌管眾天使以及靈界的掌權者及權力者。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。