上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
雅各書
1 我雅各是上帝及主耶穌基督的僕人，欲給所有分散佇逐所在上帝的子民請安。
信心及智慧
2 兄弟姊妹，恁抵著逐款試煉的時，著想做是通歡喜的代誌，
3 因為知影恁的信心經過考驗會產生忍耐。
4 恁著忍耐到路尾才會當達到完全閣完整，攏無缺點。
5 恁中間若有人欠缺智慧，著對上帝祈求，伊會賜互恁，因為上帝會真慷慨無保留賜互攏總的人。
6 不過，恁著靠信心祈求，毋通憢疑；憢疑的人親像海湧互風掃，起起落落。
7-8 此款人三心兩意，所做無定性，免想欲對主得著什麼。
散赤及富裕
9 散赤的兄弟姊妹得著上帝提升，著歡喜；
10 富裕的人受上帝降低，嘛著歡喜。富裕的人會親像草花謝去。
11 日頭一下出，燒風一下吹，草焦去，花謝去，伊的媠就消失。富裕的人嘛是按呢，會佇無閒奔波的中間消失。
試煉及引誘
12 忍受試煉的人真有福氣；因為伊有經過考驗，會領受上帝應允互疼伊的人活命的花冠。
13 人受引誘的時，毋通講「我互上帝引誘」，因為上帝𣍐受邪惡誘惑，伊家己嘛𣍐引誘人。
14 人受引誘，是互家己的慾望引誘陷害。
15 慾望懷孕就生出罪惡；罪惡成熟就產生死亡。
16 親愛的兄弟姊妹，毋通受欺騙。
17 一切美好的賞賜及一切完全的恩賜是對天頂光明的源頭所賜。伊無改變，嘛無天體轉踅引起的影。
18 伊照家己的旨意用真理的道來造咱，互咱佇受造的萬物中有上重要的地位。
聽及實行
19 親愛的兄弟姊妹，著知！逐個人著急欲聽；毋通急欲講；毋通急欲受氣；
20 因為人的受氣𣍐當實現上帝公義的要求。
21 所以，著消除一切垃墋的習慣及貫滿的邪惡；著用溫柔的心接納彼個種佇恁心內會當救恁的道。
22 著實行道理，毋通騙家己講干焦聽道理就好。
23 若有人聽道理無實行，伊親像人照鏡看家己的面相，
24 詳細看了後，一下離開，隨時𣍐記得家己生做啥款。
25 毋拘有啲詳細查考互人得著自由彼個完整的律法，閣有啲堅守的人，伊的所做一定會得著上帝賜福，因為伊有實在去實行，毋是聽了就𣍐記得。
26 若有人想講家己真敬虔，毋拘無控制家己的嘴舌，是啲欺騙家己，此個人的敬虔攏無路用。
27 照顧苦難中的孤兒寡婦，閣保守家己無染著世俗的腐敗，對父上帝看起來，這才是純全無缺點的敬虔。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。